Skip links

Amit Shah be tur ITLF hruaitute’n Aizawl pan mek

 

Aizawl: Mizoram chief minister Zoramthanga thurawn anga naktuka New Delhia Union Home Minister Amit Shah be tur Indigenous Tribal Leaders Forum (ITLF), Manipur, hruaitu te chuan vawiin Pathianni hian Lamka aṭangin Aizawl an rawn pan.

Hriat tawh angin, Manipura chi leh chi intihbuaina chhuah hnu aṭang khan Zofate’n Imphal an kal thei tawh lo a, Meitei ho pawh tlangram lamah an kal thei chuang bik lo a. An inṭhen phawk mai a ni. Kuki chen tamna Kangpokpi lam chuan Nagaland lam atangin Delhi an pan tlangpui a, Mizoram lam hnaih Lamka (Churachandpur) district lam chuan Aizawl aṭangin Delhi an pan thin.

Ziah tawh ang khan, Inrinni (August 5) khan Union Home Minister Amit Shah chuan ITLF hruaitute chu Delhi-ah inbiakna neihpui a duh thu hriattirin ITLF hruaitute pawh nilengin an ṭhukhawm nghal a. Mizoram Chief Minister Zoramthanga thurawn an lak hnuah Thawhṭanni (August 7) hian Union Home Minister chu inbiakna neihpui an remti ta a ni.

Manipura Zofa Hnam Hruaitute (ITLF) hian Union Home Minister-in a sawmna chungchangah uluk taka ngaihtuahna sengin venthawn rûk pawh an nei a. Thutlukna khirhkhan siam ngaih hunah leh engkima an lo rawn ṭhin, ‘Pa’ bera an neih Pu Zoramthanga, Mizoram Chief Minister chu rawn hmasa lehin, “Home Minister meuhin a rawn sawm che u chuan kal ngei a ṭha e, kal loh ngawt chu a ṭha lovang; hmaichhanah ngei engkim sawipuina hun ṭha tak a ni,” tiin Chief Minister hian thurawn a lo pe a ni.

Chief Minister thurawn angin ITLF Hruaitute chuan Union Home Minister Amit Shah chu hmuh an remti a. August 07, 2023 (Thawhṭanni) hian Delhi-ah inbiakna an nei dawn ta a ni. ITLF hruaitute hi vawiin August 06, 2023 (Pathianni) hian Manipur chhuahsanin Delhi an pan hman beisei a ni.

Manipur buaina tawp hun tur sawi theih a ni lova. Buaina lian zawk a thleng leh lovang tih pawh sawi theih a ni hek lo. Hetiang boruak hnuaiah hian tawnhriat ngah leh thutlukna khirhkhan siam ngaih huna thluak fim tak hmang thei, Zofate tan huaisen taka ding ṭhin leh Hnam Thuthlung nghet taka vuantu kan mamawhna hi a la sang dawn chauh a; Zofate tana Pa nih tling Pu Zoramthanga ang hruaitu hi Manipura Zofate  pawhin ram hruaitu atan kan la mamawh dawn chauh an ti hial a ni.

He thu ziah lai hian ITLF hruatute chuan Lamka aṭangin Aizawl an rawn pan mek a. Aizawl leh Lamka hi kilometre 370 vela inhlat a ni.

Aizawl lo pan mek ITLF thupuangtu Ginza Vualzawng chuan Pu Zoramthanga thurawn an la tih sawiin, naktuk Thawhtanni hian thlawhnaa Delhi pan an tum thu a sawi.

This website uses cookies to improve your web experience.
Home
Zoram Chronicle
Subscribe
Facebook