Skip links

Imphala la chambang Kuki chhungkua hnawh chhuah an ni

Thlalak: New Lambulane-a Biak In kang bang

Aizawl: Imphala Kuki hnam la chambang chhungkaw tlemte te chu Zirtawp zan zanlai khan tihluihna a um chhuah an ni.

New Lambulane Vengah Kuki chhungkaw tlem te la chambang, an vaiin mi 24 te chu nizan zanlai khan police thuama inthuam te chuan Home department thupek bawhzui nia insawiin an in aṭangin an hnawtchhuak a ni.

“Kan bungraw lakna hun pawh siam sak loin ran ang maiin min khalh a, bulletproof motor-ah min nawr lut a ni,” tiin hnawhchhuah zinga mi Rev S Prim Vaiphei chuan a sawi.

An mu tui lai rawn ṭhawng harhin a biling a balangin anmahni lo nghaktu motorah chuan a hnuk lut niin an sawi.

New Lalbulane Veng hi Zohnahthlakte chen tamna veng a ni ṭhin a. A tam zawk an chhuah vek tawh laiin mi tlemte an lo cham bang a ni.

Hetih lai hian, advocate pathum Manipur High Court-a Prof Kam Khan Suan Haushing tana ding te chu an inhnukdawk thut. Heng advocate pathum — S Chittaranjan, Th Zinngo leh Ch Victor te hian an inhnuhdawh thu hi ziakin Manipur High Court-ah an thlen a, Court chuan an inhnuhdawhna hi a pawm sak a ni. An inhnudawh chhanah chuan ‘mi mal thila harsatna’ an chhuanlam a ni.

September 1 khan mipui engemaw zat chuan Singjamei Veng, Imphala S Chittaranjan chenna in lam an pan a, pawi an khawih hmain police in an hnawt darh thei hram a ni.

Press Conference-a a thusawinaah Chittaranjan chuan a thawhpui pahnihte nen an senior counsel Anand Grover-a ngenna avanga Prof Kam Khan Suan Haushing-a tana din remti an nih thu sawiin, anmahni pawh Manipuri ve tho an ni tiin Manipur mipuite rilru tih nat an duh loh thu a sawi a, inhnuhdawh an ti thlu ta a ni, a ti.

Prof Kam Khan Suan Haushing hi University of Hyderabad-a thawk niin Manipur chi leh chi intihbuaina a chhuah hnuah national paper engemaw zatah article ziakin TV pawhin an interview fo a. Hei hi Meitei ho chuan hau in a lakah hian thubuai an theh lut a ni.

Prof Kam Khan Suan mimal zalenna hi engti zawng pawha rahbeh sak chu Meitei ho thil tum niin a lang.

This website uses cookies to improve your web experience.
Home
Zoram Chronicle
Subscribe
Facebook