Skip links

Israel buainaah Mizoram aṭanga pem thlate an la him rih

Aizawl: Kar hmasa Inrinnia Hamas terrorist-te’n Israel inringlo lai an rawn beih thutna-ah khan Mizoram leh Manipur aṭanga Zofa Israel-a pem thla te zingah vanneihthlak takin thi leh hliam an awm lo.

Israel hnam bo sawm zinga pakhat Manashe thlah nia inchhal Bnei Manashe (Manashe fate) an tih mai hi 1990 chho vel aṭang khan Israel ramah an pem thla ṭan a. 

Mizoram aṭangin mi 1500 pem tawhin Manipur atangin mi 3500 an pem tawh niin Pu Asriel-a, secretary, Shavei Israel Mizoram chapter chuan a sawi. Shavei Israel hi Israel rama hmunpui nei, khawvel hmun hrang hranga Israel hnam bo zawngtu pawl an ni.

An pem thlak hnua khuta piang te nen chuan mi sang nga chuang fe chu Bnei Manashe te hi an awm ve tawh tihna a ni.

Tunah hian Mizoramah Israela an pem ve hun nghak mi 800 atang mi 900 vel an awm mek niin Pu Asriel hian a sawi.

Israel ram dan angin mipa kum 18 tling tawh phawt chu sipaia ṭan tur a ni a. Bnei Manashe Council president Lalam Hangshing-in a sawi danin tunah hian Israel sipaiah Bnei Manashe mi 200 chuang an ṭang mek a, mi 300 vel chu ‘reservist’ an ni. Sipaia ṭang zui duh lo emaw sipai bang emaw kha ‘reservist’ an ti a, a ṭula hun koh mai theih turin an inralring reng ṭhin a ni.

Gaza ramri hrulah hian Bnei Manashe awm an awm ve nual na a, terrorist ho rawn beih ni kha Sabbath ni tak a nih avangin an inkhawm bo lai a ni a, an him phah niin a lang. Farm pakhata music festival lo hmang mek ho kha thi nasa zinga mi an ni.

Tute nge Bnei Manashe chu?

1970 chho vel aṭang daih tawh khan Mizote zingah Israel hnam bo Manashe thlah kan ni ti pawl an awm a. He ngaihdan hi Manipur lama Kuki unaute zingah pawh darh chho zelin, Mizoram leh Manipur-ah mi engemaw zatin Juda sakhua vuanin Israel hnam zinga pakhatah an inchhal a.

Israel rabbi pakhat Eliyahu Avichail chu kum 1986, 1988 leh 2004 khan Mizoramah a lo zin a, Mizo mi ṭhenkhatin Israel hnam bo kan ni e an tih chu uluk taka a zirchian hnuah a pawmpui a. Hetia Israel hnam bo an nihna pawmpui an nih takah chuan 1990 chho vel aṭang khan mi engemaw zat chu an Israel-ah an pem ta a. He mi hnu fe kum 2005 khan Israel chief rabbi Shlomo Amar chuan Bnei Manashe te hi Israel hnam bo ngei an ni e, tiin BBC-ah a puang a nih kha.

Mizoram leh Manipur aṭanga pem thla ho hi a tirah chuan Gaza Strip-ah hian dah an ni deuh ber a, in leh lo te neiin huan thlai siamin an inbengbel a. Mahse, Israel hi kum 2005-a Gaza aṭanga a inhnuhdawh a, Palestine hnena a pek takah khan hmun hrang hrangah an awm leh ta zawk a. Hna hrang hrang thawkin khawsa thei tak tak te pawh an ni hlawm a ni.

(Video screenshot-a lang khi Hausuanmanga niin, Lamka aṭanga 2000 kuma Israela pem thla a ni a. Sipaia kum 20 a ṭan hnuah reservist-ah awmin tunah hian a awmna khua West Bank hmar lama Ofra khua vengin ralthuam nen inralring rengin a awm a ni.)

This website uses cookies to improve your web experience.
Home
Zoram Chronicle
Subscribe
Facebook