Skip links

Israel leh Hamas indona-ah Zo tlangvalin hliam a tuar ve

Mizo-Israel sipai ṭhenkhat

Aizawl: Israel leh Hamas indona-ah kar hmasa khan Nathanel Touthang chuan hliam a tuar a, ani hi Mizo-Israel zinga hliam tuar hmas ber nia hriat a ni.

Lebanon ramri hnaiha a duty laiin Hizbullah ho bomb siperin a fuh palh a, hliam a tuar a, rang takin hmun him lamah phurh nghal a ni.

Mizo-Israel zingah engzat chiah nge tel tih hriat theih a ni lo a, a lo berah reservist 300 vel chu koh zingah an tel ve a ni.

Israel leh Hamas indona ni 18-naah Isarel sipaite’n Gaza an beihnaa thi zat chu 5,000 an chuang tawh. Hamas hovin Israel pitar pahnih an hren an chhuah a, an pasalte erawh chu Gaza-ah hren an la ni. 

Israel sipai thupuangtu Daniel Hagari-a’n Aljazeera a hrilh danin darkar 24 chhung khan Israel chuan hmun 400 a bei a, he’ng zingah hian Hamas firfiakho tawmkuk leh Muslim biakin (mosque) engemaw zat a tel a ni. 

Nizan khan Israel indo thlawhnate chuan Gaza hmar lama al-Shati raltlan tawmna buk an bomb a, in tlusawp a tam avangin thi zat hriat theih a la ni lo.

Thawhṭanni zana Gaza hmun hrang hrang Israel sipaite’n an beihna-ah hian mi 140 aia tlem lo an thi ni a hriat a ni. Indo thlawhna hmanga Israel-in Gaza a beihna-ah hian Tel al-Hawa khua-ah Palestinian chanchinbumi Roshdi Sarraj chu a thi a. Gaza an runna-a chanchinbumi thi zat hi 28 an tling ta.

Israel Energy Minister chuan Hamas hovin Gaza a Israel mi an rukbote an hren avangin lei lam sipaite’n Gaza an run tum chu an ţhulh dawn lo tih a sawi a. Lebanon leh Israel ram inrina lai a Hezbollah firfiakhote leh Israel sipai indona avangin October ni 8 aţang khan Lebanon rama mi 19,000 zet chenna in nei lovin an awm tawh niin United Nations migration agency chuan a sawi.

Hamas firfiak hruaitu hlun Omar Daraghmeh chu West Bank aţanga Israel sipaite’n an man hnu-ah an kuta a awm laiin a thi a. Hamas leh Islamic Jihad pawlte chuan an man hnu-ah Israel sipaite kutah a thi niin an sawi a. Tubas leh Ramallah khua-ahte mipuiin kawng an zawh a ni.

United Nations chuan Israel leh Hamas indona chu a rapthlak tak em avangin hemi chungchang sawihona atan inkhawm hmanhmawhthlak a kova. US President Joe Biden chuan Israel Prime Minister Benjamin Netanyahu chu phone a bia-in Gaza chhunga harsatna hrang hrang tawkte ṭanpuina pe chhunzawm zel turin a ngen a ni.

This website uses cookies to improve your web experience.
Home
Zoram Chronicle
Subscribe
Facebook