Skip links

Kum 20 hnua a vawi khatna’n Manipurah Hindi film chhuah dawn

Mary Kom movie poster (Representational image)

Aizawl: Manipura kum 20 hnua a vawikhatna atan Hmar Students’ Association Tuiṭhaphai Joint Headquarters chuan India Independence Day denchhenin Thawhlehni zan (August 15) hian Hindi film an chhuah dawn.

Hindi film hi Rengkai vengah chhuah a nih tur thu HSA hruaitute chuan an sawi a. Rengkai, Lamka, hi zaithiam hmingthang Lalruotmawi chawrchhuahna hmun a ni nghe nghe.

Independence Day denchhena Hindi film chhuah a nih kher chhan hi Meitei hel pawl ho runluihna’na tih a nih thu HSA hruaitute chuan an sawi bawk.

Meitei hel pawl pakhat People’s Liberation Army political wing Revolutionary People’s Front chuan September 2000 aṭang khan Manipur ramchhungah Hindi film chhuah an khap a.

Meitei hel pawl dang te pawh hian Hindi film chhuah khap hi an thlawp bawk a. Kum 2000 hma daih aṭang khan Imphal cinema hall-ah te chuan Hindi film chhuah hi an khap daih tawh zawk a ni. Meitei hel ho chuan Hindi film te hi Meitei culture kalh a ni e, an ti a ni. Chutih lai erawh chuan Meitei hnam hi Hindi film ngaisang em em mai an ni si a, inchhungah te chuan video leh TV ah an en ru tho a, tin, an Meitei film siam ho pawh hi Hindi film entawna siam a ni deuh vek bawk.

Hriat theih chinah Manipurah chuan mipui en theih tura Hindi film chhuah hnuhnun ber chu Kuch Kuch Ho Ta Hai tih kha a ni a. Chumi hnuah chuan cinema hall leh big screen ah Hindi movie chhuah a ni ta ngai lo a. Manipur hmeichhe boxer chanchin (biopic) ‘Mary Kom’ tih Priyanka Chopra channa ngei pawh kha Manipurah hian chhuah a ni ve lo a ni.

Meitei hel pawl zinga paruk vel hi India sawrkar pawhin terror group-a a puan an ni a. India atanga inlak hran tum, Hindi leh India mainland mi hrim hrim pawh ngai thei lo an ni a.

HSA thuchhuahin a tarlan danin Meitei hel pawl United National Liberation Front/Kangleipak Communist Party te chuan kum 2006 khan Hmar hmeichhe 20, kum tling lo pawh telin, te chu an pawngsual a. An puangsual chhan hi Hmar te hian Pherzawl district-a remna leh muanna an awm theihna tura India Army te hmalakna an thlawp vang niin an sawi.

HSA chuan India ram Zalenna Ni denchhen hian Meitei hel ho leh Meitei sawrkar laka zalenna an puang ve a. Chumi entirna atan chuan Meitei helho phal loh Hindi movie chhuah an tum hi mipui tam thei ang ber en turin an sawm a ni.

“Meitei misualte avangin Manipura Zofate engemaw zat chu an in leh lo atanga um chhuah an ni a, Har Ghar Tiranga (Mahni in theuha Hnam Puanzar zar) ti tur pawhin in (ghar) an nei ve lo a ni,” an ti bawk.

I

This website uses cookies to improve your web experience.
Home
Zoram Chronicle
Subscribe
Facebook