Skip links

Kuminah Mizoram kan inthlang ang em?

Aizawl: Mizoram chu kumin kum tawpa inthlang turin kan inbuatsaih mup mup laiin Sawrkar Laipui lam aṭangin thu thar a lo awm a, inthlang lo mai thei dinhmunah kan ding niin mi thenkhatin an ngai a ni.

Modi-a sawrkar chuan Lok Sabha inthlan hnuhnung ber 2019 hma lam daiha an lo aupui tawh Ram Pakhat, Inthlan Pakhat (One Nation One Election) tih chu tih puitlin ngei an tum niin a lang a. Inthlan Pakhat tih chu India ram inthlan Lok Sabha leh State Assembly zawng zawng hi vawi khata a ruala inthlan tihna a ni.

August 31 (Ningani) khan Sawrkar Laipui chuan September 18 aṭanga ṭan tur ni-nga-awh Parliament ṭhutkhawm neih a nih tur thu a puang thut a, hetah hian ‘One Nation, One Election’ bill put luh ngei an tum nia ngaiin Eptu lam an phawklek hle a, inhnialna a chhuak nghal viau bawk.

A tuk Zirtawpniah, Sawrkar Laipui chuan president hlui Ram Nath Kovind kaihruaina hnuaiah India ram puma a ruala inthlanna neih theih a ni ang em tih zirchiang turin High Level Committee a din a. A tuk Inrinniah he committee member tur pariat hming puan nghal a ni a, member-ah hian Home Minister Amit Shah, Congress hruaitu leh Lok Sabha MP Adhir Ranjan Chowdhury, Rajya Sabha-a Leader of Opposition hlui Ghulam Nabi Azad, jurist Harish Salve, Chief Vigilance Commissioner hlui Sanjay Kothari, Finance Commission chairman hlui N.K. Singh leh Lok Sabha Subhash secretary general hlui C Kashyap te an tel a. He committee thutkhawmah hian Ministry of Law and Justice-a Minister of State pawh tel ve ṭhin tura ruahman a ni.

Eptu party lam chuan Modi-a Sawrkar ruahmanna hi duh loin, Congress hruaitu Adhir Ranjan Chowdhury chuan member tura ruat a nihna hi a pawm loh thu ziakin Home Minister Amit Shah a hriattir nghal a.

Congress hruaitu hlun K C Venugopal pawhin X-ah (X hi Twitter hming thar a ni) a dodal thu sawiin, “India parliamentary democracy sawp chhiat tumna a ni,” a ti. Venugopal hian he committee-a Congress President Mallikarjun Kharge telh ve a nih loh chhan pawh a zawt bawk a ni.

High Level Committe chuan eng nge a tih dawn?

HLC hian Lok Sabha, State Legislative Assembly, Municipality leh Panchayat (keini lamah chuan VC leh LC) te chu a rual inthlan buatsaih theih a ni ang em tih te an en a, chumi atana Constitution siamṭhat ngai te zirchiangin rawtna an theh lut ang. Constitution bakah Representation of the People Act, 1950, the Representation of the People Act, 1951, leh dan tesep hrang hrang pawh ennawna siam ṭhat a ngai dawn a ni. HLC hian inthlan zawng zawng atana electoral roll pakhat neih chungchang pawh an en tel dawn a ni.

Tunah hian BJP-kaihhruai NDA ep turin party hrang hrang intelkhawmin Congress kaihhruaina hnuaiah I.N.D.I.A (Indian National Development Inclusive Alliance) an din fel tawh a. I.N.D.I.A chuan he BJP kaihhruai sawrkar hmalakna hi anmahni Eptu Ṭangrual lo lian chho mek a hlauh vangah a puh.

Tun Hma Lam

India ram a lo independent a, Inthlan buatsaih a nih hmasak ber 1951 atanga 1967 thleng khan Lok Sabha leh State Assembly te kha a ruala inthlanna neih ṭhin a ni a. Amaherawh chu, state assembly ṭhenkhat kum-nga-term zawh hmaa ṭhiah ngai te a awm tak avangin inthlan ṭhat a ngai a, chuta ṭang chuan a lo rual lo chho ta a ni. Indira Gandhi, kum 1966 aṭanga Prime Minister a lo nih hnu khan state assembly ṭhiah mai mai kha a ching a, amah leh a party dinhmun sawh ngheh nan. Tin, Indira Gandhi kaihruai Congress a phel avangin a hun hmain 1971-ah Lok Sabha inthlanna neih a ṭul leh bawk a, chuta ṭang chuan a ruala inthlan neih theih a ni lo chho ta zel a ni.

Law Commission of India, NITI Ayog, leh Parliamentary Standing Committee te pawhin India rampum a rual veka inthlanna neih hi an lo zirchiang tawh a. Standing Committee on Personnel, Public Grievances, Law and Justice chuan December 2015 khan zirchianna report a lo theh lut tawh a, Law Commission 21-na pawhin national party hrang hrang te, Election Commission of India, sawrkar babu te, zirna sang lama mithiam te leh dan lam thiam chi hrang hrang a rawn hnuah draft report a theh lut tawh bawk a.

Law Commission chuan rampuma a ruala inthlanna neih hi inthlan senso a tlem phah dawn bakah, security force te hna a tih tlem phah bakah, a khat tawka inthlang tura inbuatsaih deuh reng ngai hi tih tawp a nih chuan development lamah hmalakna a chak zawk a rin thu a report thehluhah a tarlang a ni.

Tun hnaia Law Commission-in ngaihdan a lak khawm lehah chuan a ruala inthlanna neih chuan, kan democracy kalphungah te, kan Constitutionah te leh state thuneihna bik te a khawih buai em tih zawhna a lo awm ta a.

Zawhna awm thei chi hrang hrang karah, Law Commission-in a khaikhawmna-ah chuan rampuma a rual inthlanna neih chu a ṭha in a duhawm a, amaherawh chu chumi ti tur chuan Constitution siamṭhat a ngai a. Tuna kan Constitutional framework aṭang chuan a ruala inthlanna neih hi a theih loh a ni tiin ngaihdan a siam a.

BJP in engtia rei nge an lo au pui tawh?

2014 Lok Sabha inthlana an chak hnu aṭang khan Prime Minister Narendra Modi hian a ruala inthlanna neih a duh thu hi a sawi fo tawh a. An manifesto-ah pawh an telh nghe nghe a ni. 

Federal structure (Sawrlai Laipui leh State Sawrkarin thuneihna kan insem zaina) a khawih buai em, tih te, a democratic lo em tih ngaihdan karah Modi-a sawrkar hian a duh phawt chuan harsa lo takin a ruala inthlan kan neih theihna tur dan hi Parliament-ah an pass mai thei tho bawk a ni.

Constitution lam thiam mi ṭhenkhat chuan Constitution siam ṭhat hranpa ngai loin article 327 hnuiah he bill hi a a pass theih tho a ni, an ti.

Nakum May thla vel hi Lok Sabha inthlan hun tur a lo ni ta a, hemi rual hian state assembly zawng zawng inthlan ve nghal tur ni ta se, Mizorama leh kumin kum tawpa inthlang ve tur state-a sawrkarna chelh mek tan chuan nuam singkhaw a  ni mai a, amaherawh chu, nikum te, nikum hmasa lawka inthlang te an awm a, chung ho chuan an dodal nasa viau ang.

This website uses cookies to improve your web experience.
Home
Zoram Chronicle
Subscribe
Facebook