Skip links

Lamka leh Aizawl inkar helicopter service tir dawn

Aizawl: Ministry of Home Affairs chuan Lamka (Churachandpur) leh Aizawl inkar leh Kangpokpi leh Dimapur inkar helicopter service phalna pe.

August 11 khan MHA hnuaia under secretary Prem Parkash-a’n Manipur chief secretary hnenah heng route pahnihah hian scheme awm sa, 75% subsidy in helicopter service phal sak a nih thu ziakin a hriat tir a ni.

Tarlan tawh ṭhin angin kumin May 3-a Meitei leh Zohnathlakte kara buaina a chhuah aṭang khan Zohnahthlakte’n Imphal an kal ngam tawh lo a. Lamka aṭang hian Imphal chu km 66 vel chauh a ni a, airport erawh chu Imphal khaw pawn Lamka hnaih lama awm a nih avangin km 60 vel tihna a ni. Lamka mite’n Delhi leh hmun dang an kal duh chuan km 370 vela hla Aizawl hi motor-a an rawn pan phawt a ngai a, Aizawl aṭangin thlawhna emaw motor thoin emaw an kal duhna hmun an pan ta chauh thin a ni.

Chutiang tho chu Kangpokpi lam pawh a ni a. Kangpokpi hi Nagaland lam hnaiha awm niin, Kuki unaute khawpui a ni a. An tan pawh rikrum thilah Kangpokpi leh Dimapur inkar helicopter service hi a ṭangkai em em dawn a ni.

Union Home Minister Amit Shah-a’n Manipura chi leh chi inkara buaina a chhuah hnu May 30-a Lamka a tlawh tum khan Zohnahthlak pawl Indigenous Tribal Leaders’ Forum te chuan heng route pahniha helicopter service tir tur hian dilna an lo thlen a. ITLF hruaitute’n kar hmasa (August 9) Delhi-a Amit Shah an zuk hmuh leh pawh khan an sawi lang nawn leh a ni.

75% Subsidy awmzia: Helicopter service na-a senso (expenditure) 75% chu MHA in pek tura tih a ni a, 25% chu State Sorkar in a tum tur a ni. MHA in 75% subsidy a pek hi NE States te tan chauh a ni.

This website uses cookies to improve your web experience.
Home
Zoram Chronicle
Subscribe
Facebook