Skip links

Manipur buaina-ah European Parliament-in India a khak

 Manipur Kristian te thlavang hauhin Europe ram an tawng chhuak 

Aizawl: European Rorelna Inpui chuan Ningani (July 13) khan Manipura chi leh chi intihbuaina chungchangah India chu na taka khakin, Manipur buaina ti reh vat tur leh sakhaw dang betu hnam tlem zawk te, a bik takin Kristiante humhim tura hma la thuai turin a hrilh.

India chuan hei hi chhang let ve nghalin, hetiang invau khanna hi pawm theih a ni lo a, Europe ramin hmanlaia an ram awm thin te laka an rilru put hmang (colonial mindset) ang chauh kha a ni, tiin Europe ram te chu chutiang rilru la pu rengah a puh ve thung a ni.

European Rorelna Inpui (Parliament)-ah hian India demna resolution hi political group panga-in an pu lut a, chu chu kut ding lam pharin an nemnghet a ni. He Parliament thutkhawm hi France-ah neih a ni a, he resolution an pass lai vel hian France tlawh turin India Prime Minister Narendra Modi chu Paris-ah a tum ve chiah bawk.

He resolution duangtu leh pu luttu te hi political group panga niin, chungte chu: left Greens-European Free Alliance, centre-right European People’s Party (EPP), centre-left Progressive Alliance of Socialists and Democrats (S&D), the liberal Renew group and the right-wing European Conservatives and Reformists (ECR) group. They account for around 80% of the lawmakers in the 705-member parliament.

(European Parliament-ah hian political group pasarih an awm mek a, chung ho chu an idealogy a zirin left tih te, centre-right tih te, liberal tih te, right wing tih tea hriat an ni).

Resolution-ah hian Manipur tualchhung buaina chuan thla hnih chuang a tlin tawh thu te, mi 120 chuangin nunna an chan tawh thu te, mi 50,000 vel an raltlan thu te, in 1,700 chuang hal ral a nih thu te, Kristian biak in 250 chuang leh temple engemaw zat hal a nih thu te tarlan a ni a.

Resolution chuan India chu theihtawp chhuaha chi leh chi intihbuaina leh sakhuana avanga tharum thawhna te ti tawp vat tur leh, sakhaw dang betu hnam tlem zawk te, a bik takin Manipura Kristiante humhalh tur leh buaina punlun zel tur veng turin a phut a ni.

Resolution chuan India ram hruaitute pawh chi leh chi inhuat theihna zawnga tawngkam cheh fo lo tur leh mipuite rilrua rinna tuh thar tur leh chi leh chi inkara palai hna thawk thei tura inbuatsaih turin a chah bawk. Sawrkar sawisel apiang misual ang maia man zel lo turin a chah bawk.

European Rorelna Inpui chuan Manipur buaina hi Hindu sakhaw dinchan tir tumtu te tih chhuahah a puh bawk a ni.

Chi leh chi inkara buainaah state police te pawh an inrawlh a ni, tiin, chuvang chuan mipuite’n sawrkarah rinna an nghat ngam tawh lo a ni, a ti bawk.

European Parliament member-te chuan mihring dikna chanvo humhalh chu India leh EU inkara insumdawn tawnna chungchangah pawh an innghahna pawimawh ber pakhat ni se an duh thu an auchhuah pui bawk.

He resolution chungchangah hian political group lian ber EPP member Sven Simon chuan, “Tu lakah mah kut zung chal kawh tum kan ni lo a. Amaherawh chu, he resolution hmang hian khawvela democracy ram lian ber (India) chu India Constitution-in a sawi anga sakhaw zalenna, a bik takin Manipur Kristiante chungah, chawi nungin kan phut a ni,” a ti.

ECR group member Bert-Jan Ruissen pawhin heti hian a sawi, “Kan joint resolution hian enge a tum tih chu a chiang viau mai — India sawrkar chu chi leh chi intih buaina leh sakhua avanag innek chepna ti tawp a, a mawhphurtute pawh hrema, Hindu sakhaw chawi vungna (extremism) hi ti reh vat turin kan phut a ni,” tiin.

He resolution tlangkawmna-ah chuan EU Commissioner Mairead McGuiness chuan, “Europeam Union chuan Manipur buaina chu ngun takin a enthli thlai reng a, nunna chan tam tak te avang te, hliam tam tak leh in leh lo tlanchhiat san tam tak te hian kan rilru a tina tak zet zet a ni,” a ti.

“EU chuan India puih hi a inpeih reng a ni” tiin, McGuiness chuan, “Min ngen a nih phawt chuan Manipur mipuite inkarah inrinna tawnna siam thar tur leh remna siam turin kan inpeih reng a ni,” a ti bawk.

India leh EU chu “strategic partners” an ni a, tiin EU Commissioner chuan, “Kan inzawmna hi inhriatthiam tawnnaa innghat a ni a, mihring te dikna leh chanvo humhalh chu kan inthian thatnaa laimu a ni,” a ti bawk.

India erawh chuan Manipur buaina hi India ramchhung buaina a ni a, midang lo inrawlh a rem lo a ti sek ve tlat thung.

Ministry of External Affairs thupuangtu Arindam Bagchi chuan, “Hetianga India tualchhung buainaa ring lo rawlh tum hi pawm theih a ni lo a, ram dang awm bet thintu te rilru puthmang (colonial mindset) tarlanna mai a ni,” a ti.

“Thuneitute chuan Manipur buaina a tawp theihnan theihtawp chhuahin hma an la a, remna leh muanna a thlen theihnan theih tawo a chhuah a ni,” a ti.

Chutiang chuan India ram hruaitute’n sawi mah se, Manipur buaina chuan thla hnih a chuang tawh chungin buaina a la reh lo a, Meitei leh Zohnahthlak Kuki-Zomi inkarah inkahna a la thleng chhunzawm reng a, Meitei lam hian Kuki-Zomi khua an la run awl lo a ni.

This website uses cookies to improve your web experience.
Home
Zoram Chronicle
Subscribe
Facebook