Skip links

MIZO HMEICHHE POLITICIAN/MLA AWM CHHOH DAN LEH TUN ṬUM PARTY LIAN HMEICHHE CANDIDATE TE BIHCHIANNA

  – Hruaia Kawlni,    The Political Observer

Thupuia luh tak tak hmain khawvel ramzau zawk han thlir hmasa ila: tunhma atang tawhin hmeichhe politician ropui tak tak, heng Margaret Thatcher (1925-2013) British Prime Minister hlui hmeichhe rothap tak mai te, Golda Meir (1898-1978) Israel Prime Minister  leh Israel dinthar leh lai hun khirtak a hruaitu ni thei te, Indira Gandhi (1917-1984) India rama hmeichhe prime minister hmasaber leh a awmchhun, a hunlaia India ram tualchhung buaina tam tak karah pawh ram hruai thei  hmeichhe fel tak, leh kan thenawm mai Pakistan,  Muslim sakhau lalna ram hmeichhe dah pawimawh lo leh ngaihnepna rama prime minister ni thei Benazir Bhutto (1952-2007) te an lo awm tawh ṭhin anih kha.

Tunlai khawvelah pawh America ram ropui hruaitu luber nih tum tawh thin Hilary Clinton te, Angela Merkel Chencellor of  Germany te, Burma ram zalenna atana tun thlenga thawk reng  Aung San Suu Kyi te ngaihtuah chuan kan mizo hmeichhia te hian engvangin nge politics hi an luhchilh loh bik ang a, an theihna te leh an thiamna te hi ram tan an hman loh bik ang tih hi zawhna lian tak a ni reng a ni.

India ram state 28 leh UT pahniha-ah hian chief minister atana hmeichhe awm tawh chu 16 lai a ni a, India rama hmeichhe CM hmasa ber chu kum 1963-ah Uttar Pradesh CM atana lakluh Sucheta Kripalani Congress kha a ni. Sheila Dikshit Congress Delhi U.T. CM kha hmeichhe CM rei ber a ni. Tun dinhmun ah tak chuan W Bengal CM Mamata Banerjee chiah hi  hmeichhe CM ni lai a awm hrih a, kum 2015-ah te kha chuan pali laiin state chief minister dinhmun an chelh a, chungte chu Vasundhara Raje (BJP), Rajasthan; Mamata Banerjee (All India Trinamool Congress), West Bengal; Anandiben Patel (BJP), Gujarat leh Jayalalithaa (AIADMK), Tamil Nadu te an ni. Thawk khat lai, UPA sorkarah phei kha chuan India ram dinhmun sang leh pawimawh zawng zawng kha hmeichhia-in an luah vek emaw tih mai turin UPA Sorkar thuneitu ber chairperson Sonia Gandhi khan an party hruaitu hlun hmeichhia Pratibha Patel kha President of India atan a candidate tir a, India ram President (2007-2012) a ni ta reng a, chu mai duh tawk lovin rorelna sang Lok Sabha Speaker atan pawh hmeichhia tho Meira Kumar kha a dah leh bawk a nih kha.  India ram, Hindu leh Muslim ho, an society-a hmeichhe dah pawimawh lo zet awmkhawmna-ah pawh hmeichhia te hi an duai lo hle anih hi.

Mizo District Council hmasa berah khan Pi Lalziki Sailo kha ṭangrual khan an nominate a. Chumi zawh term dawtah khan Pi Maria Hmingliani, Mizo Hmeichhe Ṭangrual kha nominate a ni ve leh a. UT kan niha MLA general election kan neih hmasak ber April 18, 1972-ah khan tu party mahin hmeichhia an candidate lova. Independent erawh chuan pahnih awm ve mah se an tling lo ve ve. Mizo Union Sawrkarah khan Pi Saptawni kha ruat seat-in an awm tir a. Hmeichhe MLA hmasa ber a ni ta. MLA inthlanpui 2-na 1978 May ni 17 leh 20 a neihah khan PC ticket-in Serchhip bial aṭangin Pi Thanmawii kha a tling a. Ruat seat ni lo, thlan pangngaia hmeichhe MLA hmasa ber a ni ve leh ta a ni. Mahse kha sorkar kha a buai a; thla ruk chiah a sawrkar ta a. Kum 1979 April-ah Inthlanpui neih ṭhat a ni leh a, ‘tah chuan Pi Thanmawii bawk kha Aizawl East constituency-ah a tling leh a. PC bawk an sawrkar leh a; PC Sawrkar khan Pi K Thansiami kha ruat seat-ah an dah a, Pi Saptawni (1972) hnu-ah hmeichhe ruat seat leh hmasa ber niin, kha sawrkar Assembly House ah khan hmeichhe pahnih an awm ta a ni. 

Inthlanpui vawi 4-na chu April ni 25, 1984-ah neih a ni leh a. Congress an sawrkar a, Pi Rokungi chu ruat seat-ah dah a ni ve leh ta a. A term erawh remna sign avangin a hmang tluan ta lo. State MLA Inthlanpui hmasa ber February ni 2, 1987-a neih-ah Pi Lalhlimpuii chu MNF ticket-a tlingin hmeichhe minister hmasa ber a ni ta. Chuta ṭang in 2014-ah Hrangturzo bial bye-election-ah Vanlalawmpuii Chawngthu kan hmu leh ta a ni.

Mizo Distric Council hunlai-in MDC hmeichhe member te: 

1.Pi Lalziki Sailo-MDC

2.Pi Maria Hmingliani-MDC

UT chin MLA kan neih theih hnua hmeichhia MLA te:

1. Pi Saptawni (ruat seat)

2. Pi  Thanmawii (thlan tlin)

3. Pi K.Thansiami (ruat seat)

4. Pi Rokungi (ruat seat)

5. Pi Lalhlimpuii (thlan tlin)

6. Nl Vanlalawmpuii Chawngthu (thlan tlin). 

Heti hian avaiin Mizoram rorelna sang ber-ah Mizo hmeichhia pariat (District Council hunlai MDC pahnih leh UT/State hnu-ah MLA paruk) kan nei tawh a ni.

(A sei deuh avangin heti chinah hian duhtawk ila, a dawtah chuan  2023-a party lian pathum Congress, MNF leh ZPM  hmeichhe candidate te kan bihchiang thung ang)

This website uses cookies to improve your web experience.
Home
Zoram Chronicle
Subscribe
Facebook