Skip links

Mizoramin a hauh chin ramah Mizo an cheng lo tiin Assam in a hnial

 

Ramri chungchanga intihbuai lai thlalak hlui

Aizawl: Mizoram sawrkarin hei hi Mizoram chin a ni e tia a hauh chin chu a zirchian hnuin Assam sawrkar chuan he ram Mizoramin a hauh chinah hian Mizo tumah an cheng lo, a ti.

Ramri buai chungchanga state pahnih inbiakna kal zelah Assam sawrkar ngenna angin Mizoram sawrkar chuan Mizoram chin nia a ngai chu ziakin Assam sawrkar hnenah a thehlut tawh a ni kha.

He mi chhanna-ah hian Assam sawrkar chuan Mizoram sawrkar chu Mizoram chin nia a chhalah hian Mizo an cheng em tih enchiang leh turin a ngen a ni.

November 17, 2022 khan Mizoram leh Assam chu ramri chungchangah Guwahati-ah an inbia a. He meeting thurel ang hian Mizoram sawrkar chuan Mizoram china a chhal khua te chu a list siama Assam sawrkar hnena thehlut tura tih a ni a.

Kumin khan Mizoram chuan khaw 60 zet chu Mizoram chhungah rinlutin chung khua te chu Mizoram chin a ni e, tiin Assam sawrkarah a thehlut ta a ni.

Assam sawrkar hnuaia Border Protection and Development Department chuan he khaw list hi Barak Valley huamchhunga district deputy commissioner te hnenah a thawn leh a. 

Field verification an neih hnuah, Barak valley huamchhunga DC pathumte chuan heng Mizoramin a hauh chin khua-ah hian Mizo pakhatmah an cheng lo tiin Assam sawrkar a hriattir ve leh ta a ni. 

Barak Valley-a DC pathumte hian he thu tho hi Mizoram sawrkar pawh a hriat tir tawh a. Mizo chenna khua a awm a nih chuan Assam sawrkar hnena hriat tir turin a ngen bawk a ni.

Assam Border Protection and Development Department chuan Mizoram chu inbiak leh hun tur pawh rawt turin a ngen a, Mizoram chuan inbiak leh hun tur chu Lok Sabha election (2024 May) hnu lam ni se tiin a chhan niin Assam lam media te chuan an ziak a ni.

Comments are closed.

This website uses cookies to improve your web experience.
Home
Zoram Chronicle
Subscribe
Facebook