Skip links

MLA bial hrang hrang bihchianna

Aizawl North I

Ziaktu: Hruaia Kawlni

Tuna Aizawl North I bial hian Chaltlang, Bawngkawn leh Durtlang te a huam a. Mahse heng veng te hi an lian hlawm hle, veng hming hrang daih pu lovin heng veng pathum chungah hian local council hran  YMA branch leh kohhran pawh engemaw zat a awm, entirna’n Chaltlang Lily Veng, Bawngkawn Chhim Veng, Durtlang Leitan han tih ang chi hi heng Chaltlang, Bawngkawn leh Durtlangah te hian a awm fur.

Inthlan hnuhnung ber 2018 khan Pu Vanlalhlana, Independent (ZPM), khan vote 7094 (40.90%) hmuin amah hnaih bertu  MNF candidate Pu Lalringliana vote 5929 hmu tu kha a hneh a.

Tun ṭumah hian he bial hi bial ngaihnawm tak leh mipui ten tunge tling ang tih an hriat chak pawl tak a nih a rinawm.

MNF candidate

Rorel lai MNF hian politician hlun leh tlo Cabinet minister a zawna term 3 ni thei awm chhun Pu R.Lalzirliana minister ni lai an dintir dawn a. ZPM in bialtu MLA ni lai leh politician hlun tho Deputy Speaker te pawh lo ni tawh Pu Vanlalhlana bawk hi an dintir leh dawn a.

Congress party pawh in politician hlun ni lo mah se  Mizo officer chhuanawm leh hriat hlawh tak, IAS retired Chief Secretary hlui Pu Lalnunmawia Chuaungo an dintir dawn a. MLA atana itawm ṭhiau an ni awm e.

MNF party candidate R Lalzirliana hi tunah kum 74 mi a ni tawh a, Ṭawi bial chung Tualbung khuaah piangin Armed Veng, Aizawlah chhungkua in an cheng. Presbyterian kohhran niin a lawina kohhrana rawngbawltu, Puitling Sande Sikul zirtirtu, Pathianni chawhnu sermon sawitu niin chanvo dang dang a chelh mek. 

Pu Zira hi candidate pathum zingah hian a upa ber a, politics-ah pawh a senior ber. Kum 1974-ah Congress party a zawm a, nihna hrang hrang chelhin, Congress-ah hian vice president hial a ni hman a; sawi tawh angin, Congress term 2 kum 10 chhung leh tun term kal mekah, a vaiin kum 15 zet cabinet minister ni zawn thei awmchhun a ni a, MLA pawh kum 1998 aṭangin a la tling ngar ngar a; kum 1998 aṭanga 2008 thleng kum 10 lai MNF rorel lai pawh khan Assembly House-ah oposition member niin, awmze neia House-ah pawh bengcheng thiam, ṭhahnem ngai tak a ni thin.

2018 inthlan dawnah MNF a zawm a, minister ni zui mah se, Congress sawrkar laia thu ber dawttu a nih lai ang kha chuan thawm a nei tawh lem lo.

A bial him thin Ṭawi bial hi a bial rei tawh em vanga chhuahsan hun ve tawh tih vanga Aizawl North I ah hian insawn anih hmel.

Tun hnai Mizoram hmun hrang hrangah Municipal, MLA, VC leh LC by electionah te ruling party che ṭha tawk lo deuh mah se MNF hi beih hupurhawm tak an la nih hmel a, chuvang chuan Pu Zira pawh hian tlinna chance a la nei ṭha hle in a lang, politics-ah tawnhriat a nei ṭha tawh a, sum leh paiah a harsa lo bawk ang a, tin, minister te an lo ni rei tawh a, mimal taka chhungkaw puih leh azara dinhmun lo insiam ve te thahnem tak an awm thei a, heng a tawnhriat te a hman thiam chuan Aizawl North I MLA nih leh mai hia harsat vak awm love.

ZPM candidate

ZPM candidate leh bialtu MLA ni lai Pu Vanlalhlana  hi Hmawngkawn, Baktawng khaw bulah a lo piang a tunah hian Venghlui, Aizawlah an cheng mek. Kum 64 mi niin politician senior pawl a ni ve ta. PC party-a awm ngar ngar ṭhin a ni a, tun hnaiah pawl hrang hrang inzawm in ZPM an din hnu a PC chhuahsan ve chauh a ni. Kum 1998 khan kha tih laia Lungpho bial ni ṭhin, tuna Tuikum bial kan tih takah hian MLA-a tlan tlin a lo ni tawh a. MNF leh PC thawh dunna sawrkar-ah khan Deputy Speaker ah dah a ni a, thawh dunna a tawp hnu khan Pu Lalnunkunga (L) MNF khan a rawn thlak ta.

Aizawl Nort I bialah hian kum 2013-ah pawh Pu Hlana hi ding tawhin Pu R Romawia Congress candidate kha a hneh ta lo a, tichuan inthlan dawt leh 2018 a ding nawn in MLA-ah a lo tling leh ta a ni.

Pu Hlana hi thiamna lamah pawh a duai lo hle a, 1984 khan NEHU atangin M.A.(Anthropology) a lo pass tawh. Presbyterian kohhran niin, an lawina Venghlui-ah hian kohhran rawngbawltu a ni a. Tun dinhmun-ah bialtu MLA ding lai a nih bakah ZPM hi abik takin khawpuiah an boruak a ṭha viauin al ang bawk nen tlin leh beiseiawm tak a nih bakah ZPM hi a sawrkar hlauh phei chuan minister dinhmun luah phak ngei a nih te pawh a rinawm.

Congress candidate

Congress lam candidate Pu Lalnunmawia Chuaungo hi a pension na la rei lo a ni a, party lian pathum candidate zinga naupang ber a ni. Politics-ah chuan a khingpui tur te aiin experience a nei lo daih zawk nain, IAS kum 37 vel zet lo thawk a ni a, sawrkar inrelbawl dan leh enkawl kawngah chuan a ṭha hlein a rinawm.

Kum 1987-ah IAS (Gujarat Cadre) a zawm a hemi hma hian IA&AS  hna a lo thawk tawh bawk . Reiek khuaa piang leh seilian niin high sikul atangin Shillong lamah zirna a chhunzawm a. Tunah hian Chaltlang Aizawl-ah an chhungkua in an khawsa mek a. UPC (N.E.) kohhran niin, an lawina kohhran ah rawngbawltu ni mek a ni.

Pu Lalnunmawia te unau hi Mizo zingah chuan an lar sa hle a, Pu Lalthara leh Pu C.Lalsawta te nen an unau thum a IAS ni thei, Mizo zingah a hmasa ber leh awmchun an nihna hi mi hriat an lo hlawh phah hle ṭhin. Gujarat state-ah kum 25 vel zet thawkin, tuna PM Modi hi Gujarat CM a nih lai aṭanga lo hrawn tawh thin a ni a, principal secretary thleng a ni hman.

Congress sawrkar tawp dawn hnaihah khan Mizoramah principal secretary-ah te rawn awmin a hnu deuh February 2019-ah, Chief Secretary a ni zui ta a. CS aṭanga a chawlh hnu pawhin Chief Information Commissioner (CIC)-ah te ruat zui a ni zel a. 2023 June ni 20 khan Congress party a zawm ta a ni.

Tunah hian Aizawl North I bialah nasa takin a campaign mek a, a mawng a la zang bawk a house-to-house campaign neiin bial chhung a fang mek a; Septemberni 4 2023 aṭangin Congress party vice president-ah ruat a ni zui bawk nen, amah tawiawmtu leh hmu tuten a phur hle niin an sawi. 

Candidate zingah bial chhung mi a nihna hi a hman ṭangkai thiam chuan a hlawk viauin a rinawm a, hei bakah hian 

Sawrkar hna a thawh chhungin a hming ṭha hle a, 2018 inthlan dawnah phei kha chuan Election lam hotute nen Mizo te tana a thil tih vangin an inhmu thiam chiah lova, amah thlavang hauin NGO in kawgzawh leh punkhawm te buatsai in, “Shasan Out, Chuaungo In” tih au rualna pawh a lar hle a nih kha.

Congress party tun dinhmun ah tla zawi deuh mahse mi thar ṭha tak tak in an zawm ve zel avang leh Mizo officer chhuanawm a lo nih ṭhinna te avang hian North I MLA ah hian tling thei dinmunah a ding a, neutral tamtak in a thiamna leh experience pawh hi awt tak tak an tam awm e.

 Advertisement

This website uses cookies to improve your web experience.
Home
Zoram Chronicle
Subscribe
Facebook