Skip links

MLA bial hrang hrang bihchianna

 

ṬAWI BIAL

Ziaktu: Hruaia Kawlni

Ṭawi bial hi Mizoram MLA Inthlan hmasa 1972 aṭang khan Saitual bial tih hming pu ngar ngarin,  2008 bial siam rem aṭang khan Ṭawi bial tih a lo ni ta a. Pu Khawtinkhuma  chu Mizo Union ticket-in 1972-a he bial MLA atan thlan tlin hmasak ber a ni. Mizorama sawrkarna siam tawh party Mizo Union, PC, Congess leh MNF ten MLA an nei vek tawh a. Sawrkarna siam ve lo party, MNF(D) chuan 1989 khan Pu Andrew Lalherliana MLA-ah an lo nei tawh a, 1993 khan MJD party candidate Pu C Chawngkunga thlan tlin a lo ni tawh bawk.

Kum 1998 aṭanga khan tun thlengin a zawn zatin Pu R Lalzirliana chu term 5 lai, kum 25 chhung teh meuh mai thlantlin a ni tawh a, term 4 hi Congress-in, tun term khat erawh MNF ticket-in a ni thung. Pu Zira hian Aizawl North I lamah a din san dawn tak avangin tun ṭumah chuan kum 25 hnuah Ṭawi bial hian tu pawh tling se MLA thar an nei dawn a, an bial MLA thar mai bakah candidate te hi la MLA lo vek an nih avangin, tu pawh tling se MLA vawikhat tlinna tur vek an ni dawn a nih chu.

Hei tak hi he bial bihchian ti chakawmtu a ni. Ṭawi bial chhungah hian polling station 21 a awm a, a bial chhung hi Aizawl aṭanga hnai te, Tuikhurhlu aṭangin a in ṭan a, Seling-ah chho in chhim lamah Thingsulthliah a va huam a. Saitual khua leh a chhehvel, Keifang te bakah Ruallung, Rulchawm, Mualpheng, Lenchim,Tawizo,Maite te a huam bawk.

MNF candidate

Rorel lai MNF party hian AMC Mayor nilai Pu Lalrinenga Sailo an din tir  dawn a. Congress party lamin bial chhung mi Thingsulthliah khua Lalringliana Khiangte an dintir dawn thung. ZPM lamin Prof.Lalnilawma Vuite an dintir ve dawn bawk. Hei bak hi party dang leh independent a ding tur te pawh an la awn mai thei, amaherawhchu, party lian 3 te candidate te chauh hi ṭum dang ang bawkin kan bihchiang dawn a ni.

MNF party candidate Pu Rinenga hi tunah kum 59 mi niin, Hliappui khua-ah a piang a, Aizawl Electric vengah seilian in, tunah erawh Durtlang North-ah an chhungkua in an khawsa mek.

Candidate zingah Ṭawi bial din tum hmasa ber a ni a, 2018 inthlan dawnah khan nasa takin hma a la hman a, bial chhungah mitthi ral, damlo kan leh thil dang dangah campaignin Ṭawi bial hi a vil deuh chawt hman a. Amaherawhchu, politics boruak a lo inher danglam a, bialtu MLA nilai leh khatih hunlaia Home Minister ni bawk Pu Zira kha MNF-ah a luh tak avangin, MNF in thatpui zawk an inbeisei avangin Pu Rinenga hi Hachhek bial-ah an sawn ta thut kha a ni a.

 Amah hi Saitual Lal Dorawta thlahte zinga mi a ni, politics-ah pawh tawn hriat a nei nual tawh a. AMC intlan hmasa ber khan thlan tlin a lo ni tawh a, a vawi hnihna-ah erawh ward no 6-ah Pu Rosiamngheta a hneh lo thung. AMC term 3-na ah tling lehin Mayor dinhmun chilh tir a ni zui ta a. Kohhran leh khawtlangah pawh inhmang tak a ni a. YMA leh VDP-ah te pawh president lo ni tawh ṭhinin, a lawina Presbyterian kohhran Durtlang North-ah puitling Sande Sikul zirtirtu ni mek a ni.

Tun ṭumah hian a din tumna a lo rei tawh bawk a, hma pawh a la nasa in a rinawm, Ṭawi bial hian ruling party MLA an nei thei viau mai a, MNF hi sawrkar nawn tur ni ta se, ani pawh hi a tlin ngei a rinawm. Candidate zingah tlin theihna nei ṭha ber pawl a ni awm e.

Congress candidate

Congress party candidate Lalringliana Khiangte hi kum 44 mi a ni a, thiamna lamah chuan MA (Public Administration) niin NET pawh a nei tel nghe nghe.  Naupang te in party-ah a inhmang a, Congress party general headquarters-ah kum 20 dawn a awm tawh. 

Thingsulthliah khua niin,  a nu leh pa te pawh Thingsul-ah hian an la cheng nghe nghe. Bial chhung mi a nihna hi a buk ti rittu ni turah amah campaigner te chuan an ngai a. Amah mai nilovin a nupui pawh Ṭawi bial chhung mi tho

Ruallung Lal,  Lalrumruta tunu a ni nge nge. Chhandamna Sipai pawl Salvation Army kohhran member a ni.

Thingtlang dinhmun hniam tak chawi kan tum avangin sorkar hna zawng lo in politics-ah a zuang lut a, candidate nih theihna hun ṭha a hmu ta a ni. 

MNF leh ZPM candidate ten an neih ve loh amah mai nilo, a nupui leh a nu leh pa te thlenga Ṭawi bial khaw hrang hranga chhungkhat laina an neih te hi a hman tangkai thiam chuan tlin theihna tha tak nei niin alang.

Thingsulthliah sub-town kan tih mai West Block lam mipui te pawhin mahni bial chhung mi tiin an phurpui viau niin alang.

ZPM candidate

ZPM candidate Prof Lalnilawma hi tunah kum 55 mi niin, Vaivakawn Seventh day tlangah chhungkua in an cheng.

Thiamna lamah Philippines ramah Rural Development subject bikah MA leh Ph D degree nei a ni a, Mizo zingah he subject bikah MA leh Ph D nei hmasa ber a ni. DRDA  leh SIRD Mizoram-ah te hna ṭha tak tak a chelh hnu-in 2007 khan Mizoram Univerity zawmin, Professor leh Head Department of Extension Education and Rural Development a ni mek.

Amah hi Seventh Day Kohhran niin, kohhran-ah nihna pawimawh tak tak Tual Upa leh Upa nihna te nei tawhin Central YMA hnuaia sub committee-ah te pawh nihna lo nei tawh ṭhin a ni.

Politics lamah chuan MNF leh Congress candidate te aiin experience an ei tlem deuh. Amaherawhchu, Ṭawi bial hi a vilna a rei ve tawh avangin inpuahchahna ṭha tak a nei a, Saitual, Keifang leh Seling-ah te house-to-house campaign a zawh khat tawh mai bakah bial chhung khaw tin deuh thaw hmabak tlemte chauh nei a nei tawh. Kuthnathawktute thlawh hma, huan leh ram te pawh a hmunah kal chilhin campaign a bei nasa tawh a, Aizawl khawpui lamah ZPM boruak a lian deuh niawma lang ang tho hian Tawi bial lamah ZPM boruak a san chuan tlin theihna a nei ṭha hlein a rinawm.

Ṭawi bial hi party tin hian West Block leh East Block in an ṭhen tlangpui a, West lam-ah VC pali, Thingsulthliah- I, Thingsulthliah II leh Thingsul Tlangnuam, Seling-ah te hi MNF VC sawrkarna vek a ni. Chutiang zawnga chhut chuan MNF hi tling mai turah a ngaih theih rualin ruling lai duhkhawp lohna a len viau chuan ZPM lam emaw Congress lamin bial chhung mi an dintir te pawh hian an vanneih pui thei awm e.

Advertisement

This website uses cookies to improve your web experience.
Home
Zoram Chronicle
Subscribe
Facebook