Skip links

MLA bial hrang hrang bihchianna

SERCHHIP

 Hruaia Kawlni

Serchhip bialah hian tun hma lam chuan Keiṭum leh Bungtlang tuna Hrangturzo bial chhung ni ta te leh Hriangtlang khua te hi a tel ṭhin. Kum 2008-a bial tih danglam a nih aṭang khan Serchhip khua bakah Thenzawl, Neihloh leh Buangpui khua te chauh he bialah hian an awm ta a, bial hming erawh a pangngai Serchhip hming a la pu zui thung.

He bial hi tunhma UT hunlai aṭang tawhin Congress ṭhatna bial tih mai theih a ni a. PC pawhin an vanglai khan MLA ṭum hnih an nei hman. MNF hian kum 1998-ah Pu K Thangzuala (L) an neih bak kha MLA an la nei leh miah lo thung. Mizo Union ticket-in MLA inthlan hmasa ber khan Pu Vaivenga (L), a hnua Congress cabinet minister leh Speaker te ni zui ta kha a tling a. UT Inthlan hnuhnung ber 1984 khan Pu Lal Thanhawla, hemi kum Inthlan aṭanga CM ni zui ta chu thlan tlin niin, kum 1998-ah Pu K Thangzuala’n term khat a chhawk tih loh chu Inthlan hnuhnung ber 2018-ah Pu Lalduhoma tling leh tih loh chu Serchhip bial hian Pu Hawla MLA-ah an nei ngar ngar a ni.

Tun ṭum Inthlan turah hian Serchhip bial hi kan sawi fo tawh angin, party lian president emaw chief ministerial candidate te dinna hi ngaihven a hlawh bikin, bial ngaihnawm tura ngaih a ni ṭhin kan tih ang khan bial ngaihnawm tak tura beisei a ni.

Hei bakah hian Mizoram history-ah MLA in bantirna hmasa ber bial, by-election boruak ngaihnawm tak kum tam la liam lova awmna nih vang te hian he bial hian titi a ti tam hle.

Rorel lai party MNF leh Congress party he bial MLA nei zing ber ten bial chhung mi, Thenzawl pa ve ve a dintir dawn a. Bialtu MLA ni lai ZPM leader tan hian by-election ang ngawt kha chu a ni tawh lo maithei.

MNF party hian politics-a la inhmang ngailo, Mizoram journalist zinga kan neih ṭhat pawl Pu J Malsawmzuala Vanchhawng chu nikum July ni 5 khan an party-ah lawmlut chawpin, he bial hi an vil tir nghal a, tunah hian MNF general headquarters-ah adviser bakah vice chairman, MNF publicity board a ni mek. MNF hian an ti fuh dawn em, i han bihchiang nghal teh ang.

Pu J Sawma hi kum 44 mi niin party lian pathum candidate tur zingah hian a naupang ber a ni a. Thenzawla piang niin tunah hian Galilee Veng, Zemabawk-ah chhungkua in an cheng mek. 

Thiamna lamah BA (Hons) LLB, PGJMC (Post Graduate Diploma in Journalism and Mass Communication) a ni a.

Politics-a a zuan luh hma hian kum 2001-ah All India Radio-ah casual announcer-ah lutin, Skylinks Vision (cable tv network) awm lai khan news presenter a ni tel a,  All India Radio leh Skylinks Vision aṭang hian DDK Aizawlah insawnin, June 2003 atanga January 2007 thleng news reporter cum news presenter-in a thawk. Kum 16 chhung zet DDK Aizawla a thawh hnuah kum 2018 atang khan Zonet Cable TV Pvt Ltd-ah news editor hna a zawm a, he hna hi MNF party-a a luh thlengin a thawk a, media-ah full time a thawh chhung hian TV programme pawimawh leh mipui hlut leh ngaihven tak tak engemaw zat a buatsaih; Inthlan Pui leh tualchhung inthlan chi hrang hrangah sawi hona (live discussion leh debate) te a buatsaih ṭhin chu mipui hriat a hlawhna tak pakhat a ni.

Rorel lai MNF hian he bialah hian tlin ngei tumin sawrkar function pawimawh leh sawrkar hmunhma hawn leh lungphum phum ang chiah te pawh bial viltu hi a kil a lungpawimawh ang maiin an telh tir zel a.

Pu J Sawma pawh hian Serchhip bial hi a awmchilh deuh chawt a tih theih awm e. Hnatlang, mibo zawn, ruang zawn nikhua ah te pawh khawtlang hruaitute ṭawiiwmin bialtu MLA ang maiin mamawh te a ngaituah sak ṭhin a, Inthlan hunah pawh hneh harsa tak a nih hmel.

Congress Party pawh hian MNF ang deuh chiahin Thenzawl khaw chhuak, an party-a awm ngai lo mi ṭha leh fel tling ngei tura an ngaih Pu R Vanlaltluanga (Matluanga) chu nikum October 2022 khan an partyah lawmlutin Serchhip bial hi an vil tir nghal a.

Pu Matluanga hi kum 49 mi niin pavalai pa fel, politics ah pawh tawnhriat lo nei nual tawh a ni a, naupang tea  sumdawng hlawhtling tih theih a ni awm e. Tunah hian Bethlehem Veng, Aizawl-ah an cheng mek a. Thiamna lamah BA niin kum 2013 Inthlan khan Aizawl South III bialah ZNP ticket in a lo ding tawh. Chumi hunah MNF general headquarters-ah secretary niin Inthlan Pui hnuhnung ber 2018-ah phei chuan MNF ticket-in Serchhip bialah hian a ding dawn emaw an ti fur tawh a. Serchhip East block (Thenzawl lam) phei chuan executive meeting-ah ban pharin, Pu Matluanga hi candidate atan an thlang hial, mahse an hotute midang an dah ta zawk a.

Chutiang khawpa Serchhip bialah hma lo la tawh ṭhin a nih vang hian bialtu MLA tan pawh tawhkhirh tak tur a ni. Serchhip khua, vote tamna berah pawh house-to-house campaign nei zo vek tawhin he bial aṭanga MLA ni ngei turin a thawk mek. Congress party muthlu deuh roh hi a kaithawh zawh chuan tlin theihna beiseiawm tak a nei.

ZPM ticket a ding tur, bialtu MLA ni lai leh leh ZPM Leader ni bawk Pu Lalduhoma hi a tlin nawn a, an party an sawrkar zawh bawk chuan chief minister ni mai tur a ni a, hmalam hun duhawm tak a nei bawk a, ti hlawhtling turin, a ṭan viau a rinawm.

Ani hi chu politics khawvelah a awm rei tawh bawk a, mipuiin kan hre sa vek a, a chanchin pawh chhiar mai tur a tam avangin chipchiar in kan sawi lo mai ang a.

Inthlan hnuhnung ber 2018-ah khan Pu Duhoma khan vote 5481 hmu-in, bialtu MLA nilai Pu Hawla vote 5071 hmu kha vote 410-in a hneh a. MLA aṭanga ban a nih vanga 2021 by-election neihah erawh kha chuan bial mipui ten, an ban dan kha awmlo an tih pui vang ni ngei tur a ni, khawngaihna a dawng nasa a, vote 8269 lai hmu in, candidate dang ho vote hmuh zawng zawng belhkhawm ai pawh a tam a hmu hial a nih kha. 

Amaherawhchu, tun Inthlan Pui-ah erawh by-election result kha chu teh nan a tlak loh hmel.

Pu Duhoma hi kum 74 lai a lo ni ve tawh a, 2028 inthlan-ah chuan 79 a lo nih ve tawh dawn avangin miin CM atan pawh an it tawh lem lo thei. Chuvangin tun hi a tan hun hnuhnung, CM a nih tumna hun ṭha tawpna a nih tawh hmel a, theih tawp a chhuah ngei a rinawm.

Bialtu MLA ni lai a nih avang leh tun hnaiah an party a ṭhan nasat avangin candidate zingah a tlin theihna a nei sang ber hial awm e. Chutih laiin thusawi thiam, orator ṭha tak ṭhin khak sual ngai lo kha a kum te a lo tam chho ve ta deuh vang nge, a thusawi leh interview a hmachhawnah te khak sual leh sawi sual palh te a nei ve ta zauh zauh mai, a zin nasa in party leader a nih miau avangin  bial pawn lamah a kal nasa viau mai a, a khingpui tur ten bial an ṭhut chilh uluk viau thung si a, chet sual palh theihna a nei.

Serchhip khua bikah hian VC 13 lai awmin veng pakhatah Congress an sawrkar a, MNF leh Congress sawrkar inṭawmna a awm bawk a, a bak VC 11-ah MNF vek an sawrkar. Bial chhunga khaw lian ber dawttu Thenzawl-ah hian VC 5 awmin MNF vek an sawrkar a, Buangpui leh Neihloh-ah hian MNF leh ZPM ten VC pakhat ve ve an la thung. Bial chhunga VC chak danah chuan MNF an ṭhat hmel ber in a lang a, amaherawhchu MLA Inthlanah erawh innghahna tlak a ni lem lo ṭhin.

Serchhip bialah hian bial chhung mi pahnih, chhungkhat laina, vua leh vang ngah nge ZPM an sawrkar hlauh chuan CM ni mai tur hi tling ang tih hriat a chakawm tawh khawp mai. Serchhip bial hi an vannei a, CM bial an ni thei viau mai a, ngaiah an neih laklawh tawh ang a, an lo chak vak tawh lo zawk hial pawh a ni thei ve tho mai.

Serchhip MLA lo ni tawh te:

UT

1. 1972- Vaivenga, Mizo Union

2. 1978- L Thanmawii, PC

3. 1979- Bualhranga, PC

4. 1984- Lal Thanhawla, INC

State

5. 1987-   Lal Thanhawla, INC

6. 1989-   Lal Thanhawla, INC

7. 1993-   Lal Thanhawla, INC

8. 1998-   K Thangzuala, MNF

9. 2003-   Lal Thanhawla, INC

10. 2008- Lal Thanhawla, INC

11. 2013- Lal Thanhawla, INC

12. 2018- Lalduhoma,      Ind (ZPM)

13. 2021- (By Election) Lalduhoma ZPM

 

This website uses cookies to improve your web experience.
Home
Zoram Chronicle
Subscribe
Facebook