Skip links

MLA bial hrang hrang bihchianna

AIZAWL WEST-III

Ziaktu: Hruaia Kawlni

He bial hian Aizawl veng pasarih Mission vengthlang, Khatla, Khatla South, Bungkawn, Bungkawn Nursery, Maubawk leh Lawipu te a huam a, AMC ward 14-na leh ward 15-na bial huamchhung te an ni. Voters singhnih sanghnih (22000) vel bawr tunah hian awm anga ngaih a ni.

Tun ṭumah hian West III bial hi bial ngaihnawm leh tunge tling ang tih mipui te’n an hriat chak pawl tak a ni awm e. Bial chhung pa fel tak hlir party lian pathum te hian an theh chhuak dawn a.

Bialtu MLA dinglai Pu V L Zaithanzama, Khatla pa hi ZPM ticket in a ding dawn a. Er.K.Sawmvela Mission vengthlang, PWD hotupa ber ni thin chu rorel lai MNF in an dintir dawn bawk a. Congress lamin an chhuanvawr ber, an rawng huai ber mai an president Pu Lalsawta Mission Vengthlang pa an dah dawn bawk avangin he bial hian ngaihven a hlawh hle.

Party lian pathum bak hi candidate te pawh an awm belh maithei, mahse bial dang bihchianna ang bawk in party lian pathum candidate te chauh hi tunṭumah pawh kan bihchiang ang.

Bial siam rem a nih a, Aizawl West I leh West II bakah Aizawl West III bial a lo pian tak hnu hian MLA term khat aia rei an la nei lo. 2008 ah khan Pu R Selthuama MCS(rtd) Congress kha thlan tlin a ni a. 2013 ah Pu Vanlalzawma ex MP MNF candidate khan Pu R.Selthuama kha rawn hneh ta a. 2018 ah Pu Zawma hi rin loh takin Pu VL Zaithanzama khan vote 6934(41.22%)hmu in  a rawn hneh ve leh thung a.

Tun tum 2023 inthlan ah hian a vawikhat nan MLA ni lai hian West III bial hi a hum zui thei ang em?

Party hrang hrang candidate te ilo thlir ang:

Aizawl khawchhung bial bikah hi chuan bial chhung AMC ward-ah tute party nge chak tih hi a pawimawh ve viau mai a. West III bial hi sawi tawh angin ward no.14 leh 15 inkawp a ni a,  Khatla lam ward 14-na hi hmeichhe tana hauh bik seat niin Pi Ramthanzauvi ZPM hi corporator a ni a, Bungkawn leh Maubawk lam ward 15-na hi general seat ni chunga hmeichhia candidate Pi Zodingpuii Congress tlinna a ni thung a. AMC result aṭanga teh chuan MNF lam aiin ZPM leh Congress te chan a tha zawk ni pawhin a sawi theih awm e.

Bialtu MLA nilai Pu VL Zaithanzama hi tunah kum 65 mi a ni mek a, Sialhawk khua-a piang niin, tunah Aizawl Khatla ah an cheng mek. Zirna lamah HSLC thleng a ni a. Rambuai lai khan rammu ve in ‘Z ‘ Battalion-ah clerk hna a thawk ṭhin. Eizawnna lamah chuan sumdawng, dawrkai  niin Aizawl ah stationery dawr nei hmasa pawl a ni awm e, gift shop te nen ti kawpin birthday cards te hi a zuar hmasa ber a ni hial awm e.

Kohhran leh khawtlang-ah a phaktawk in a inhmang nasa hle thin, PC party-ah awm ṭhinin MLA a nih hma hian Khatla VC leh LC member te a lo ni tawh ṭhin.

Tun ṭumah hian tling leh turin a bei nasa viau a, Aizawl khawpui ah tunhnaiah ZPM boruak sang chho mek nia a lan mek bawk avang hian tlinna chance nei ṭha ber a ni hial awm e. Amah puitu leh thlawptute sawi danin an veng Khatla lamah te hi chuan a dinhmun pawh a ṭha hle a, ral lehlam Maubawk leh Lawipu lamah te ṭan lak a tum mek a ni awm e.

Amah hi pa ṭawng tam lo a nih vangin Mizo ten politician ṭhaa kan teh fona thusawi thiam mi pawh a ni hran awm lo a. Assembly house-ah pawh hian Pu Duhoma leh Dr Mathantea te hi an lansarh deuh ṭhin vang hian ZPM MLA dangte hi an performance hmuh tur a tam lem lo. Amaherawhchu, ani hi House-ah langsar tak a che chi ni lo mah se a MLA fund hman danah te leh a bial enkawl danah te a che ṭha viau niin amah tantu lam chuan an sawi.

MNF candidate tur Er K Sawmvela hi pa ropui tak mai a ni a. 2020 ah PWD hotu lu ber engineer-in-chief aṭanga chawl chauh a ni a, party lian candidate zingah chuan politics-a tawnhriat nei tlem ber a ni.

Serchhip district-a khaw lian vak lo Hmunṭha khaw chhuak a ni a. Naupan lai aṭanga lehkha thiam thei tak a ni. High sikul a kal laiin rambuai-ah MNF sipai-ah a inpe a, ‘S’ battalion-ah awm a, a lehkha thiam theih vangin Army headquarters-ah awm zuiin Chin (Burma), East Pakistan(Bangladesh) leh Arakan-ah te a kal kual. 1974-ah Jail aṭanga chhuakin lehkha a zir zawm a, Assam Engineering College Gauhati atangin BE (civil) a zo leh ta a ni.

Aizawl West III bial chhung Mission Vengthlang-ah in beng belin, sawrkar hna a thawh chhung hun tam zawk Khatla area, Shivaji Tilla sawrkar quarters-ah kum 20 chuang lai Er.K.Sawmvela hi a lo khawsak tawh bawk vangin bial chungah hian veng pahnih lai mai in “Kan vengpa” tiin duhsaktu a neih theihna lai hi a chance tha a ni. Tin, West III bial hi MNF ṭhatna ṭhin a ni a, term hmasa mai (2013-2018)-ah pawh MNF chakna bial a ni.

Politics ah tawnhriat nei tam lo mah se atan bial beiseiawm tak a ni thei awm e.

Hei bakah hian sawi tawh angin Er.K.Sawmvela hi pa ropui tak mai a ni a, Mizoram sawrkar-ah rei tak a thawh hnuin USA-ah master degree zir zo leh thei ngat, nupui fanau te nen America-a zuk awm, Zoram thlakhelh vanga lo haw leh a ni a. A tih tawh lam bei nasa mi niin  tuna Zoram kawng lar tak World Bank Road kan tih mai hi atir aṭanga buaipuitu a ni bawk a. “World Bank Kawng leh Keimah” tih lehkhabu pawh a ziak hial a ni. Hetiang mithiam hi West III bial mai bakah Zoram mipui tan pawh rorelna sanga ṭhu turin a zahpuiawm loh hle awm e.

Pu Lalsawta, Congress Party President ni mek hi a chanchin sawi tam vak lo pawhin kan hre sa nual awm e. Tunah hian kum 77 a ni a,  West III bial candidate zingah a upa ber. Politics-ah pawh tawnhriat a ngah ber awm e. Ṭum 3 a MLA tawh a, ṭum hnih, kum 10 zet cabinet minister a lo ni tawh nghe nghe bawk.

Aizawl Luangmual-ah piangin, tunah hian a nupui fanau te nen Mission Vengthlang Aizawl-ah an cheng mek.

Thiamna lamah pawh mi chungchuang niin Mizoram Civil Service (MCS) hmasa a ni a,  sawrkar hna ṭha leh nihna ṭha bansanin politics-ah a zuang lut a. LLB niin ukil hna engemaw chen a lo thawk tawh bawk. Hetia party politics-a inhmang chung hian distance learning an tih mai, ralkhat atanga inzirin degree engngemawzat a zirchhuak tel bawk.

Tun ṭum 2023 inthlan dawnah hian Aizawl South I (Bethlehem, Venghlui,College veng etc) lamah a ding dawn a sawi a ni zet a, South I bial Congress hruaitute pawh an phur hman viau awm e, mahse remchang zawk tiin ama chenna veng bial lam West III ah hian a tum nghet ta zawk a ni.

Pu Lal Thanhawla MPCC President aṭanga a chawlh hnu December 2021 atang khan Congress president a ni ṭan a. Lehkhabu te reuh te, a tet ang aia thawm nei ring tak “Ṭhat Loh Theihlohna Bawm” tih chu a ziak a, he a lehkhabu hming leh Mizoram kaihhruai a tum dan a ziak te chu mipui titi a tling phak hial.

Party lian president hrim hrim hi chuan huhang an ngah a, West III bialah pawh hian midang aiin tum tlai deuh mah se tlin beiseiawm tak chu a ni tho awm e. Tunah hian he bial chhunga AMC Corporator Pi Dingpuii te nen campaign an bei ngawrh chho viau a. Amah ṭantu leh thlawptu lam sawi danin, “Pu Sawta chu neutral pawhin an duh a, Cogress ni lo pawhin min vote pui ṭeuh dawn in kan hria” tiin an sawi.

Congress sawrkar lai khan Finance Minister a ni a, amah vang hian sawrkar leiba pawh a tlem phahin, sum a enkawl dan a ṭha niin an sawi a, hei tak hi Pu Hawla chawlh hnu pawha Congress Party in an president atan an duh nachhan pawh niin alang.

Congress hi rorel zo hlim hlawt an nih vangin mipui te hian an la lawm lutuk lo ni te pawhin, a bik takin Khawpuiah chuan, a lang a. ZPM leh MNF candidate te tan pawh politics khawvel a anni aia ropui leh hlawhtling zawk anga lang ni mahse Pu Sawta hi an hneh thei.

Chutih rual erawh chuan Congress boruak vang nilo, a mimal hmingṭhat leh a lo tih ṭhat tawhna te vangin Pu Sawta hi dinhmun duhawm takah chuan a ding tho niin a lang.

This website uses cookies to improve your web experience.
Home
Zoram Chronicle
Subscribe
Facebook