Skip links

MLA bial hrang hrang bihchianna

 HACHHEK


Ziaktu: Hruaia Kawlni

Hachhek bial hi Kum 1972 UT lai khan Rengdil Constituency hming a pu a. Chumi hnuah Lokicherra(Zawlnuam) leh Kawrthah constituency te a lo piang ve leh a. Tuna Hachhek bial tak hi chu tun hma Kawrthah leh Zawlnuam bial ni ṭhin inkawp kha a ni ta a ni.
He bialah hian voters pawh 23000 chuang daih an ni a, tun hma aṭangin Congress ṭhatna ṭhin bial a ni a, Pu Saikapṭhianga pawh ṭum 5 zet Congress ticket a thlan tlin a lo ni tawh nghe nghe. Bial hnih ṭhin inkawp ta a nih avangin Hachhek tlangdung lam Kawrthah bial leh phairuam lam Zawlnuam politics kalphung te hi a in ang lo em em a, sawi thiam pawh a har hle awm e. Hei bakah hian boruak thlir thiam ti harsatu ni ṭhin chu Tuikuk Tripura camp-a voters 4000 chuang lai awm ṭhin kha an ni a. Mahse tunah chuan heng Tuikuk te hi Tripura lama awm nghet tura inremna ziah a lo nih tak avangin Mizoram electoral roll aṭangin an hming pawh paih ṭeuh a ni tawh a, Election department lam chuan kumin Inthlanpui hmaa paih zawh vek hman a in beisei bawk a, Tuikuk vote helai bial tichiri ṭhin tu kha tun ṭumah hi chuan a awm tawh lo turah a ngaih theih awm e.
He biala MLA ni tawh te:
1. 1972- Zalawma, INC (Rengdil Constituency)
2. 1978- C.Vulluaia, PC (Kawrthah Constituency)
3.1979- Saikapthianga, INC (Kawrthah Constituency)
4. 1987- J.Thanghuama, MNF(Lokicherra Constituency)
5. 1987-Saikapthianga, INC (Kawrthah Constituency)
6. 1989-Saikapthiang, INC (Kawrthah Constituency)
7. 1989- Lal Thanhawla, INC (Lokicherra Constituency)
8.1993-Saikapthiang, INC (Kawrthah Constituency)
9.1993- John Rotluangliana, INC (Lokicherra Constituency)
10. 1998- K.Sangthuama, MNF (Kawrthah Constituency)
11. 1998- Tawnluia MNF, (Lokicherra Constituency)
11. 2003- Saikapthianga, INC (Kawrthah Constituency)
12. 2003- Tawnluia MNF, (Lokicherra Constituency)
13. 2005 – By Election Saikapthianga, MCP (Kawrthah Constituency)
14. 2008- Lalrinmawia Ralte, INC 
15.2013- Lalrinmawia Ralte, INC 
16. 2018- Lalrindika Ralte, INC
MLA ni tawh tarlan a tam chhan leh kum inang a awm chhan hi sawi tawh angin Hachhek bial hi tun hma Kawrthah bial leh Lokicherra (tuna Zawlnuam ni ta) bial inkawp a nih miau avangin heng bial 2 a MLA te hi kan tarlang kawp a ni.
Sawi tawh angin Hachhek bial hi Congress thatna ṭhin a ni a, tun hnai inthlan hnuhnung 3 (2008, 2013, 2018)-ah te pawh Congress MLA hlir an nei.
Tun boruakah lut dawn ila, Congress hian an MLA dinglai bialtu MLA Pu Lalrindika Ralte an dintir leh dawn a. MNF lam pawhin an MLA zinga thawmna leh pa lar minister nilai tuna Aizawl East II bialtu Pu Robert Romawia Royte chu Hachhek bial lamah hian an kal tir dawn tih a chiang tawh a.
Tun hnaia party thang duang ZPM lamin mithar la in candidate ngai lo K J Lalbiakngheta, Zawlnuam Vengpui mi an din tir dawn thung. Heng lo pawh hi ding tur an la awm maithei a. Tun ṭumah erawh hi chuan party lian 3 candidate tur te chauh hi a mal mal in kan bihchiang ang.
Inthlan hnuhnung ber 2018 khan tuna MLA dinglai Lalrindika Ralte Congress party hian vote 6202 a hmu a, chu chu vote tla zawng zawng aṭangin 33.32% a ni. Amah hnaih bertu Lalrinenga Sailo MNF khan vote 5836 a hmu thung. Tun tumah pawh hian bialtu MLA nilai hi a dinhmun tha berah a ngaih theih awm e. Pu Lalrindika Ralte hi Hachhek bial chhung Kawrtethawveng khawchhuak niin lehkha zirsang chu a ni lo na in tun term-a Congress MLA 5 zingah hian a ṭha pawl leh House-ah pawh thu ṭha tak tak sawi thin, dikna duh mi tak niin alang. Hachhek bial hi sawi tawh ang in Mizo hlang hlir awmna anih loh avangin bial chhangchhe pawla ngaihtheih, sum leh paiin awmzia a neih a, insen so deuha ngaih pawhin MLA a nih hma pawha buhfai supply lama sumdawng a ni bawk a buai lo tura ngaih a ni. Hei bakah hian a bial mipui te pawhin a bial enkawl danah sawisel em em tur an nei hran lo niin a lang.
MNF lam candidate hi a chanchin sawi vak pawh ngai lo khawpa mi hriat hlawh sa a ni a. Zawlnuam hi tunhma lama a lo awmna leh a hnathawhna thin, a khua tia a chhal ngam a ni. 2018 inthlanah khan Aizawl East II bialah Finance Minister ni lai leh tuna Congress President ni ta Pu Lalsawta chu vote 5869 (41.26,%) hmu in a hneh a nih kha.
Amah hi politician tur renga piang emaw tih tur khawpin tuang tichhah thei mi a ni a. Politics a luh chilh phat aṭangin tun hma lamah eiruk thubuai avang á der ang hial tea puhna te pawh menah a thlaka tih mai tura chhang let miah lo leh chutianga sawitute pawh haw zui ngailo mi a ni a. A tih tawh lamah mi chak a ni bawk a, Sports Miister a nih chhung pawhin phullem phah leh Infiamna hmunhma siam a ngah hle. A bial kalsan a Hachhek lam a pan daih hian ngaituah a ti thui hle. Sumdawg hausa ṭhin a neih midang tan a ui lo mi a lo ni bawk nen bialtu MLA ding lai tan pawh beih huphurhawm tak a nih hmel a. A lo tling a nih pawhin thil mak a ni lem lovang.
ZPM candidate Pu K J Lalbiakngheta hi ala upa lova, politicsah mi thar ni mah se thiamna lamah pawh a duai lo hle. MA (political science) a nih bakah Pathian thu zirna lamah BD a ni tel bawk a.Tuikual Presbyterian School, Aizawlah Principal hna a chelh reng ṭhin a, politics lamah a kal tak vangin he hna hi a bansan ta a ni.
Zawlnuam Hachhek biala khawlian ber pa a ni bawk a, vote pawh a hmu ṭha tura beisei a ni. ZPM hi khawpui lamah an boruak a ṭhat chhoh viau laiin he bial kher hi chu an thawm a rin tawk lohna a ni maithei thung, chuvangin Hachhek bialah hian MLA dinglai Lalrindika Ralte leh MNF candidate Robert Romawia Royte te hi inbei ber turah chuan a ngaih theih. Chutih laiin ZPM lam hi an candidate a zahpuiawm lo bawk a, han zuam viau chi chu a ni chuang lo.
This website uses cookies to improve your web experience.
Home
Zoram Chronicle
Subscribe
Facebook