Skip links

MLA bial hrang hrang bihchianna

HRANGTURZO

   -Hruaia Kawlni, The Political Observer

Hrangturzo hi tum hma lama N Vanlaiphai bial tih ṭhin kha a ni a. Bial siam rem a nih hnu hian tun hma lama tel ngailo Khawchhak lamah Biate bakah Serchhip lam hnaih Keiṭum leh Bungtlang te telh belh niin khaw 17 he bialah hian a awm. A bial chhunga khaw lian deuh te chu N.Vanlaiphai, E.Lungdar, Khawlailung leh Biate te hi an ni awm e. 

Tun hma lamin Congress sawrkara cabinet minister ṭhin Pu C L. Ruala khan a bial reng thin a. MNF kum 10 (1998-2008) chhung khan  Pu R Lalawia leh Pu D Thangliana te’n an bial ṭhin a. 2008-ah Pu Lalthansanga (Chatea), PC, in bial ve le in 2014 bye-election aṭangin Vanlalawmpuii Chawngthu MLA-ah an nei leh a, tun term tawp tur chiahah Pu Lalchamliana Home Minister ni mek bial an ni leh ta a ni.

Tun tum inthlanah hian bialtu MLA a din nawn dawn tak loh avangin MLA thar he bial hian a nei dawn a.

Party lian pathum MNF, ZPM leh Congress party candidate te kan bihchiang dawn a ni. Ṭum dang ang lo takin The Political Observer chuan a tling tura a rin pawh a hmuh dan tarlan a tum bawk ang.

MNF rorel lai hian an candidate zinga naupang ber Pu Lalremruata chhangte an din tir dawn a, ZPM lamin an Gen.Secy zinga mi pakhat Pu Lalmuanpuia Punte an dah thung a. Congress candidate Pu Lalroenga hi an zingah upa ber a ni thung.

Inthlan hnuhnung ber 2018 khan MLA tling ta Pu Lalchamliana MNF candidate khan vote 4572 a hmu a, amah hnaih bertu Vanlalawmpui Chawngthu khan vote 3815 a hmu thung a, an inthlauhna kha vote 757 a ni.

Tun tum MNF candidate Pu Lalremruata Chhangte(Maremruata) hi kum 36 mi a ni a, a pa chu Upa C.Hrangthanga a ni. He bial chhung E.Lungdarah a lo piang a, a pa hi Lungdar khua niin, a nu hi N.Vanlaiphai khua a ni thung. A pa hnathawhna avangin N.Vanlaiphai lamah hian inbengbelin an khawsa hlen ta thung. Tunah hian amah hi chu a nupui fanau te nen eizawnna neiin Aizawl Vaivakawn Vengah an cheng mek thung.

Thiamna lamah M.A. (Political science) niin zirlai a nih lai aṭangin high sikul leh college-ah te zirlai hruaitu ni chho ngar ngarin Mizo Student Union (MSU) general headquarters-ah general secretary leh OB post dang te a lo chelh tawh ṭhin a, Tuichangral zirlai pawlah president te pawh a lo ni tawh nghe nghe. Chumi hnu ah MNF zawmin MNF-ah hian an thalai pawl MNYF-ah vice president post pawh a lo chelh tawh a, tunah hian MNF general headquarters ah hian secretary ni lai a ni.

Kohhran lamah Presbyterian kohhran niin Vaivakawn an lawina kohhranah Naupang Sunday Sikul zirtirtu a ni mek a, YMA-ah pawh section hruaitu OB nihna hrang hrang a chelh tawh.

Sawi tawh angin Maremruata hi Hrangturzo khaw lian ber pahnih hi “ka khua” tia chhal thei a ni a, hei hi a hman thiam chuan chak puina tham ni lo mah se vote tam tak hmuh theihna a ni.

Amaherawhchu, bialtu MLA ni lai a ding dawn nge a chawl dawn tih hriat lawk loh karah hma la maithei lova a awm chhung a rei ve deuh a, hei hian a pawt hniam ve thei bawk. Rorel lai party an ni bawk a kum 5 chauh a la ni bawk nen party mi pawh la nei tha ber tura ngaih an ni a. Tlin theihna tha tak nei in a lang.

Congress candidate Pu Lalroenga hi kum 67 a ni a, candidate zingah hian a upa ber a, apa chu Sawichhuma (L) a ni a, Hrangturzo bial chhung Leng khaw chhuak a ni.

Tunah hian Aizawl Republic Vengah nupui fanau, tu leh fa te nen an cheng mek. Thiamna lamah chuan Pawl 10 niin ITI ah welder hna train chhuak a ni bawk. Mi taima tak mai niin sumdawng, dawrkai chungin tunah chuan PWD hnuaiah first class contractor a ni mek.

Politics-ah pawh a senior ber awm e, kum 1984-ah Congress zawmin, grass root level aṭanga bul ṭanin MPCC general headquarters ah general secretary ni mek a ni.

Republic Veng Cogress unit president te, block president te ni chhoin, Aizawl district Congress Committee (ADCC) hruaitute ni chho zelin MPCC-ah pawh media department secretary te leh driver cell chairman te pawh a lo ni tawh a. Politics-ah tawnhriat a ngah tawh hle.

Presbyterian Kohhran niin an lawina kohhhranah rawngbawltu a ni a. YMA lamah pawh an branch adviser a ni mek a, hei bakah an vengah Games and Sports te leh Cultural Club te pawh in pe ena an en, adviser hlun ṭhin a ni.

Hrangturzo bialah hian Pu James Thanghmingmawia ding tura tihfel an ih deuh tawh hnuah remchang zawkaparty hotute hriat vangin ani hi a ding ta zawk a. Inbuatsaihna hun hi midang aiin a nei tlem ta deuh a. Hrangturzo bial hi Congress ṭhatna ṭhin a ni a, party muthlu a kaithawh zawh hman chuan chak theihna a nei. Sawi tawh angin politics, abikin inthlanah te tawn hriat ngah tawh a ni a. Khawzawl bial lamah Pu Rinliana Sailo campaign hotu ṭhin a nia, sum leh paiah a mamawh khawp hman tur a neiin a rinawm bawk a, campaign hun tawp hman ṭangkai dan a hriat chuan a dinhmun a ngaituah awm awm love.

ZPM candidate Pu Lalmuanpuia Punte hi kum 56 mi a ni a, a pa chu  Thanzama a ni. Mamit district chhung Rawpuichhip bul Tuahzawl khaw chhuak a ni a, tunah chuan Aizawl Kanan Vengah a nupui fanau te nen an cheng mek. Thiamna lamah BA a ni. Salvation Army kohhran niin an lawina-ah rawngbawlna chanvo pawimawh tak tak a chelh mek bawk.

Pu Lalmuanpuia Punte hi zirlai pawl hruaitu hlun tia mihriat hlawh a ni a. MZP tluchhe tawh kum 1993 a tungdingtute zingah tel in MZP dinthar leh hnu a President hmasa ber ani nghe nghe.

Hei bakah hian India hmarchhak zirlai pawl inzawmkhawm pawl North East Student Organisation (NESO)an tih ah kum 13 zet vice vhairman a ni a. Assam CM hlui leh tuna Union Minister ni mek Sarbananda Sonawal te hi chairman niin an thawk ho thin. Hmarchhak state a politics inhmang dinhmun pawimawh chelh mek thiantha tam tak a nei.

Hei bakah hian Zofate insuihkhawm lehna lam tuipui mi a ni a, ZORO-ah tun thleng in vice president niin UNO hmunpui Geneva te thleng thlengin Zofate aiawh a thu sawi tawh a ni.

Politics-ah pawh tawnhriat a nei nual tawh a. A khingpui tur te hi vawikhat MLA dinna ve ve an ni a, ani chu kum 2013 ah Tuivawl bial ah leh 2018 ah Serlui bialah te ZNP/ ZPM hminga lo ding tawh a ni.

ZNP-ah Ṭhalai president a ni ṭhin a. ZPM-ah an inchhunfin hnuin general secretary leh Political Affairs Committee (PAC) member te a ni mek.

Tun ṭumah hian a khingpui te aia a vanneihna chu Hrangturzo bialah hian a tum chiang hmasa ber a,  thui tak candidate dangte aiin hma a lo la hman a.

Aizawl khawpui pawnah chuan Hrangturzo bial hi ZPM boruak ṭhatna pawl tak a nih bawk hmel avangin thlin theihna sang tak nei niin alang.

Party tin in an dinhmun ṭha ber ṭheuhin an sawi hlawm a. The Political Observer chuan Hrangtuzo bialah hian boruak danglam thut te a awm a nih loh chuan ZPM dinhmun ṭha ber rihah a ngai a. Amaherawhchu ziaktu mimal ngaihdan liau liau a ni e.

Advertisement

This website uses cookies to improve your web experience.
Home
Zoram Chronicle
Subscribe
Facebook