Skip links

PARTY LIAN HMEICHHE CANDIDATE-TE BIHCHIANNA

 Hruaia Kawlni, The Political Observer

Tun ṭumah chuan kumin Inthlan Puia party lian pathum Congress, MNF leh ZPM  hmeichhe candidate-te kan bihchiang ang:

Kum 2018 inthlan pui khan hmeichhia 15 zet an ding a, tlin theih beiseiawm kha chu khatih laia minister Vanlalawmpuii Chawngthu leh chhim lam ZPM hotunu Pi Rinpuii te kha an ni deuh mai a. Tun ṭumah erawh party lian pathum Congress, MNF leh ZPM te hian hmeichhe candidate pahnih ṭheuh an nei ta a, 2023-ah hian hmeichhia hrim hrim hi 16 an ding dawn.

Heng zingah hian party lian pathum hmeichhia te chanchin bihchianna leh an bialah an tling thei ang em tih ngaihdan pawh tum dang ang lo takin kan sawi nghal ang.

MNF aṭanga Aizawl East II bial-a ding tur: B LALAWMPUII

B Lalawmpuii hi P B Vanlalauva (L) leh K Lahmachhuani (L) fa upa ber niin 1976-ah Chhinga Veng-ah a piang a. Dr Joel Lalnghakliana Pautu nen innei in Chhinga Veng-ah an fate pali nen an khawsa mek. Zirna lamah B Com a ni a. A nulat lai aṭangin a phak ang tawkin khawtlang leh kohhran-ah a inhmang ve a, tunah hian rawngbawlna lamah Chhinga Veng Kohhranah thupui hawngtu leh senior department sirtirtu a ni mek.

Kum 2015-ah khan AMC inthlanah Ward -IX ah reserved seat-a hneh taka thlan tlin a ni a, kum 2021 AMC inthlanah a bial ngai ah general seat-a hneh taka thlan tlin a ni leh a,t unah hian executive corporator a ni mek a, a hna chan pual hneh takin a enkawl mek a ni. Pary headquarters-ah MNWF treasurer a ni mek bawk a ni.

Aizawl East II bialtu ni mek Robert Romawia Royte Hachhek bialah a din dawn avangin he bial hian MLA thar an nei dawn ngei mai a.

Pi Maawmi hian tlin theihna sang tak a nei a ni. Din loh aia dintir ve mai mai chu a ni hauh lo mai. A khingpui tur te hi ZPM aṭangin B Lalchhanzova, he bialah 2018 Inthlana independent (ZPM) tho-a lo ding tawh Dawrpui Veng leh Congress aṭangin PC Lalhmingthanga, Armed Veng South a cheng, AMC Mayor hlui, hmanni lawka Congress zawm thar te an ni. An ni pathum zingah hian Pi Maawmi leh Pu Chhanzova te hi inbei ber turah ngaih an ni. Pu Lalhmingthanga hi a tum tlai deuh hret vangin an ni pahnih hi a umpha lo deuh riha ngaih a ni awm e. He biala vote tamna Chhinga Veng hian an veng nu hi an puih ṭhat chuan tlin mai a harsa lo ang. The political Observer chuan ZPM candidate nen 50-50 vel a tlin theihna neiah a ngai.

MNF atanga West Tuipuia ding tur:
PROVA CHAKMA

Prova Chakma hi kum 1975 khan a lo piang a, zirtirtu chhungkua-a seilian a ni. Zirna lamah MA (Edn) a ni a, government middle school zirtirtu niin kum 24 leh thla 10 lai zirtirtu hna hi a thawk a; kum 13 vel lai service a la neih laiin 35 West Tuipui mipuite nawrna avangin ram tana rawngbawl turin a hna bansanin MNF a rawn zawm ta a ni. NGO lamah pawh a  phak tawkah inhmangin, Chakma Mahila Samiti Nunsury-ah kum 13 lai president hna a chelh tawh a. Nunsury Zone Chakma Mahila Samiti-ah pawh president a chelh bawk. Tin, Chakma School Teacher Association-ah pawh auditor leh treasurer-in kum enegemaw zat a lo awm tawh bawk a. Tunah a pasal leh a fa te pahnih nen Nunsury-ah an cheng  mek a ni.
West Tuipui ah hian MLA ni lai leh Mizoram MLA zinga a zawna ding rei ber tawh Congress candidate Nihar Kanti Chakma leh ZPM atangin Kawlhnuna Indian Forest Service aṭanga chawl ta te nen an inkhing dawn a.
The Political Observer chuan he biala a din ṭan tirh ata hneh lo la nei lo Nihar Kanti Chakma hi Prova Chakma hian a hneh lo deuhin a ring tun dinhmun ah chuan.
ZPM atanga Lunglei East-a ding tur: LALRINPUII

Pi Lalrinpuii hi Pu Vaithatchianga leh Rothangi te inkârah a lo piang a, 1983-ah Rev Dr K Sapthanga Lunglei Chanmari Veng nen Chanmari Baptist Kohhran Biak In-ah inneiin fanu pathum an nei a ni. Thiamna lamah BA a ni.
UDC, P&E Deptt. Mizoram sawrkar-ah hna a lo thawh tawh bakah Krupanadhi Group of Institutions, Bangalore leh Public Relations Officer SRK Construction Pvt. Limited-ah te public relations officer hna a lo chelh tawh bawk.
Kohhran leh khawtlangah nihna pawimawh tak tak sawi sen loh a chelh tawh a. Kohhran bakah MHIP-ah secretary, Chanmari Branch te pawh a lo ni tawh ṭhin. Zoram pawn an awm laiin nihna pawimawh tak tak a helh nual bawk a, chung zingah chuan president, Bangalore Mizo Association te pawh a lo ni tawh thin.
Politics a luhchilh hnuin president, Zonu Southern Hqtrs, Lunglei te, ZPM-ah treasurer leh vice president te a nih hnuin president ZPM Southern Hqtrs, Lunglei a ni ta.
Pi Rinpuii hi kum 2018 MLA Inthlan khan Lunglei East-ah ZPM candidate niin vote 72 in a tling zo ta
lo a. Tunah hian MNF aṭangin MLA ni lai leh Lunglei High Power Committee vice chairman Lawmawma Tochhawng leh Congress aṭangin term hnih MLA tawh leh Lunglei High Power Committee vice chairman pawh lo ni tawh tho, parliamentary secretary hlui Joseph Lalhimpuia te nen an inkhing dawn a. An lawina kohhran ah upa ve ve an ni bawk. Pi Rinpuii tan hian huphurh awm viau mahse tlin theihna duhawm tak neiin kan hmusak a, a lo vanduai anih pawhin pathumna chu a nih hmel loh in kan hria.
ZPM atanga Aizawl South III-a ding tur: 
BARYL VANNEIHSANGI

Baryl Vanneihsangi hi Pu Vanrochhuanga leh Mizo zaithiam hranghlui Pi Lalhriatchhungi te fanu a ni a, tunah kum 32 mi niin pasal a la nei lova, party lian 3 te hmeichhe candidate zingah a naupang ber a ni nghe nghe. Tunah hian Aizawl Model Vengah an cheng mek.
Mizo ten Baryl-i kan hmelhriat chhohna hi TV presenter/host a nihna aṭang te in a ni awm e,  LPS programme en hlawh tak Comedian Search host te an ni chho a hei bakah programme.dang dangah pawh kan hmu thin. FM Zoawi leh Red FM-ah radio jockey (RJ) te pawh a ni tel bawk.
Thiamna lamah BA hi Union Christian College Barapani-ah zoin MA (History) NEHU-ah a zo leh.
Ṭhalaite zingah nula fel leh entawn tlak a nih vang hi a ni ang chu kum 2020 September thla-ah ZPM in an party-ah sawm lutin AMC inthlan-ah ward no.19 na-ah an dintir a, a tling zui ta a ni.
Tunah AMC lama a bial ṭhenkhat telna Aizawl South III bialah a ding dawn a. A khingpui tur te hi bialtu MLA ni lai MNF candidate Prof F Lalnunmawia leh Congress aṭangin Pu Rosiamngheta  AMC awm tirh ata la tling char char awm chhun te nen an inkhing dawn a ni.
Aizawl South III bial hi Aizawl hming pu si-ah chuan AMC area pawn khua tel tamna ber a nih mai bakah thingtlang khaw te dang pawh a huam nual a, Hmuifang, Chamring, Lungchuan, Chawilung te Sialsuk leh Sailam thleng rawk a huam avangin general election-ah chuan hmeichhe tlin mai harsatna a la nih hmela rin a ni. Hei bakah hian he bial Sateek bial a nih lai aṭanga MNF ṭhatna ZPM lam in MLA an la neih ngai lohna bial te a nih avangin Baryl-i hi The Political Observer chuan Mizo nula fel, zei  hmelṭha leh lehkhathiam lar ni mah se a tling pha chiahin a ring lo deuh.
Hei bakah hian bial chhung hian politics boruak hran a nei ve a, kum 10 lai lo bial tawh tu Pu KS Thanga leh a hote ZPM lama kal indawr fuh loh vanga MNF lam kal leh te hian thui tak a nghawng tel theiin a ngaih theih bawk.
Congress atanga Aizawl South I-a ding tur VANLALAWMPUII CHAWNGTHU
Vanlalawmpuii Chawngthu hi Pu C Chawngkunga leh Pi Lalliankimi Sailo te inkarah a lo piang a, tunah hian kum 44 a ni mek a, Dawpui Vengthar, Aizawlah an cheng mek. Thiamna lamah MA(Political Science) a ni.
Ani hi a pa Pu C Chawngkunga pawh politician hlun minister te pawh lo ni tawh a ni a. A pa hnung zuiin kum 2017 khan minister of state-ah lakluh niin pafa a minister ni thei awmchhun Mizo zingah an ni. Tleirawl aṭangin politics-ah in hmang chhoin Congress ṭhalai pawl MPYCC-ah te treasurer leh president te a lo ni tawh a. 
Tunah hian Congress nuho pawl Mahila gen headquarters-ah president a ni mek. MPYCC president a nih lai kum 2014 khan Hrangturzo bial by-election-ah tlan tlin niin Mizo nula MLA hmasa ber a ni a, Chairperson, Mizoram Women Commission te a nih hnuin Pi Hlimpuii Minister aṭanga kum 27-na-ah Pi  Mizo hmeichhe minister leh hmasa ber a ni ta a ni.
2018 inthlan khan Hrangturzo bialah bawk ding leh in Pu Chama, tuna Home Minister hi a hneh ta lo. Tun ṭum hi MLA vawi 3 a dinna tur a ni a. Ani hi Congress-a an hotu lawk Rahul Gandhi ang deuha mahni pa te hnung zuia hmelṭha leh lehkhatiam ni chunga kawppui ngaihsak lova politics lama in pe a ni a. 
Tun ṭum Aizawl South I bialah hian bialtu MLA ni lai ZPM candidate C Lalsawihvunga leh MNF aṭanga ding Mizoram Rajya Sabha MP ni lai, MP thawmna tak R Vanlalvena te nen an inkhing dawn a.
Tlin theihna a neih rualin South I bial hi MNF sawrkar hmasak (1998-2008) kum 10 chhunga R Tlanghmingthana MNF bial him ṭhin a ni a, Congress in MLA 32 lai neia 2008 an rawn sawrkar pawh khan South I bialah hi chuan ZNP vice president K.Liantlinga a tling daih thung. Kum 2013 khan Congress chuan term khat R Vanlalvena an nei hram.
Hetiang a nih avang hian The Political Observer chuan a mimal ṭhat lohna nilovin Congress bial him nih ṭhin loh avang hian chak lo thei niin a ngai. A ṭan thiam erawh chuan hmeichhia ni mah se experience nei ṭha a ni bawk a tlin theihna a nei bawk awm e.

Congress atanga Lunglei South-a ding tur: MIRIAM L HRANGCHAL

Miriam L Hrangchal hi Pu Lalhmingthanga (L), politician hlun ex Dy CM fanu a ni a. Tunah hian kum 50 mi miin a pasal D.Zoliana leh an fate nen Khatla Aizawlah an khawsa mek.
Delhi Public School, RK Puram leh Hrangbana College Aizawlah te lehkha zirin thiamna lamah graduate a ni. Sawrkar sikul-ah kum 22 a thawh hnu in a bang a, pre school ṭha tak a din bakah Vestige company-ah hian a hlawhtling hle bawk a. NE India aṭangin India Vestige Millionaire’s Council member awmchun a ni bawk.  Kohhran lamah BCM central church member niin, BCM Central Church, Bible Society of India-ah secretary ni mek a ni.
June 2023 khan Congress partyah lawmluh niin Lunglei Southah a ding zui ta. 
A pasal hnamdang a nih vangin zirlai pawl ten an dodal a, Aizawl ah kawng zawh meuh a dodalna a tawh karah theih tawp chhuah in a campaign zel a.
Lunglei South-ah hian bialtu MLA nilai Dr K Pachhunga MNF leh ZPM aṭangin B Lalramliana te nen an inkhing dawn a ni. ZPM candidate hi Congress a seat a chan loh avanga ZPM a lut ta a tih theih awm e. Dr K Pachhunga hi 2013-a a tlak hnuin kum 2018 ah hneh taka thlan tlin a ni. Lunglei South-ah veng leh khua hi 36 awmin a inkarkik hle. 
ZPM  candidate B Lalramliana hi Salem Vengah awmin Dr K Pachhunga hi Lunglawnah a khawsa thung. Dr K Pachhunga awmna Lunglawn hi MNF Party ṭhatna a ni a. Lunglawnah hian vote 2,654 awmin he bial chhunga voter tamna ber a ni a. Lunglei South-ah hian voter 18,898 a awm bawk a ni.
Tun dinhmunah hian a khawi ber nge tling ang tih hriatthiam a harsa. LMC Election thlir chuan ZPM hi sang tak tura ngaih an ni a. Nimahsela, MLA Election meuh chu LMC ang ngawt chuan boruak a kal dawn lo, tih hi a chiang. ZPM member hi an tam lo. Mahse an phûr ber thung. LMC-ah an beisei phak bakin vote an hmu miau a. A awm a ni. LMC a tel phak lo, voters hi a tam zawk an nih miau avangin ngaihṭha takin an awm thiang lo.
Congress hi an party dinhmun hi Pu S Laldingliana a boral hnu khan hniam lam an pan a, a nihna dik takah chuan he bialah hian atirah Congress Party an chhe ber. An worker te an ngui a. Mahse Candidate tur Miriam L. Hrangchal hi rin aiin a ṭang thei a. Tun dinhmunah Congress boruak a sang leh tawh. Congress hian MNF aṭang deuh hlirin mithar an lawmlut a. An mithar lawmluh hi MNF Block hruaitu leh Unit hruaitute an ni hlawm.
Hei vang hian bial ngaihnawm tak a chak tur hriat har tak bial ani awm e.
This website uses cookies to improve your web experience.
Home
Zoram Chronicle
Subscribe
Facebook