Skip links

Rorelna ṭha awm loh vangin thingtlang leh khawpui inthlau: Dr Lalthlamuana

Upa Dr Lalthlamuana

Luangpawn (Saitual): Department of Information & Technology a Chief Informatic Office Upa Dr Lalthlamuana Khawlhring chuan khawpui leh thingtlang inthlau lutuk chu rorelna ṭha awm loh vang nia a hriat thu Luangpawn YMA Golden Jubilee lawmnaah vawiin August 31 khan a sawi. 

He hunah hian khuallian nia thusawiin Upa Dr. Lalthlamuana Khawlhring chuan, “Rorelna ṭha a awm loh avangin khawpui leh thingtlang nun a la inhlat hle tih a taka ka hmuha ka rawn hriat hian ka mittui a tla hial a ni,” a ti a, hnukulh avangin a thusawi lai rei ngial a chawlh phah a.  

Rorelna dik ringawt hi a tawk tawh lova, rorelna ṭha kan neih a ngai a ni tiin, “Mualpho kan hlau tawh lova, a langin kan eiru a, kan zak tawh lo,” a ti bawk.

Mizoramah hian rorelna ṭha a awm loh avangin mirethei leh hausa inkâr a zau em em tih sawiin “Rorelna dik ringawt hi a ṭha lo. Rorelna ṭhaah chuan a bika chawikanna a awm tur a ni a, chu chu a pawimawh zawk,” a ti. Mizoram tichhetu eirukna leh kut tling lova sum chheprelh chîngte avangin Zoram hian a nih tur ang a ni pha lova, a ti.

“Aizawla in ropui tak tak ngîr khupte khu “Sum dik lo taka lak luh avanga in-chhek-ar-bawm-na a ni a, kan zak tawh lo,” tiin a sawi.

Khuallian Pu Thlamuana hian sawrkarin hmasawnna hna a thawh chi hrang hrangahte hian a ram neitu kuthnathawkte hi a râwn ngai lova tiin a sawi a. Mipuite leh a bik takin a tuartu loneitute chu sawrkarin râwn ṭhin se, an ngaihdan te pawh la vein an rilrem zawngte pawh ngaithla ve duh tur sawrkar kan mamawh a ni, tiin hmasawnna hnathawh avanga lo nei mite tawrhna chi hrang hrang thleng ṭhin avanga pawi a tih thu a sawi. 

Langtlang sawrkar a awm loh avangin department hotute zinga a tu ber avanga dilna leh lehkha pawimawh a tân fo thu tarlangin, langtlang sawrkar kan neih loh avangin “sawrkar hnathawkten nuam an ti lutuk a, an zalen lutuk,” a ti a. Chutianga sawrkar hnathawk inthlahdahte nam kal theitu tur sawrkar kan mamawh tih sawiin, file kal muang lutuk leh rei tak tak chin hriat lohva a awm ṭhin avangin “A mawhphurtu hriat chhuah nan a pawimawh,” tiin lantlang sawrkar neih pawimawhnate uar takin a sawi.

Luangpawn YMA Golden Jubilee lawmnaah hian The Kneeling Band member Pu Lungmuana leh zaithiam chuai thei lo Zorinzuali Khiangte bakah Phullen khaw zaithiam Lalruatzeli ten zaiin mipui an awi a. YMA hruaitu hrang hrang, a bik takin Tuivai group , Ṭamdil group leh Saitual Sub Hqtrs YMA hruaitu ṭhahnem tham takin Luangpawn YMA Golden Jubilee lawmna hi an telpui.

Luangpawn khua hi Mizoram tlang sang ber pathumna Mawmrâng tlang bul ṭhuta awm niin Mizo National Army-te inkhuarna hmun pawimawh tak, kan chief minister ni mek Pu Zoramthanga pawh a lo tlat fo tawhna khua kha a ni a. Rambuai avanga Phullen khuaa khalh khawm an nih avangin chattlak miah lova YMA a din aṭanga chhiara a kum 50-na cham vawiin hian an hmang ve chauh a ni.

Luangpawn YMA chuan khawtlang huap ruai a buatsaih a. Lawi, vawk leh ar-te talh a khaw nawta ruai ṭheh a ni.

 

This website uses cookies to improve your web experience.
Home
Zoram Chronicle
Subscribe
Facebook