Skip links

‘Thihna Ruamah Assembly session tel ngaihna a awm lo’

MLA 60 awmna Manipur Assembly-a Zofa MLA 10 te

Aizawl: Manipura Zohnahthlak (Kuki-Zomi-Hmar) MLA sawm (10) te chuan Imphal valley chu an tan “Thihna Ruam” a ni e, tiin kar leh maia ṭan tur Assembly session chu an tan tel ngamna chi a ni lo a, an tel dawn lo tih vawiin (August 25) khan an sawi nawn leh.

Kuki MLA pakhat Saikot bialtu Paolienlal Haokip chuan heti hian Zoram Chronicle a hrilh: “Kuki, Hmar, Zomi leh Mizo te chunga Manipur sawrkar hriatpui tharum thawhna kan dodal zia entirna atan session-a tel loh kha kan rel tawh a, chutah chuan kan la ding a ni.”

Manipur Governor Anusuiya Uikey chuan Assembly session hi Thawhlehni lo awm tura ṭan turin a ko a ni.

An sahimna ngaihtuah pawhin Assembly session chu tel vena chi a ni lo hrim hrim tih sawiin Paolienlal chuan, “Imphal Valley chu keini Kuki, Hmar, Zomi leh Mizo te tan Thihna Ruam a ni ngawt tawh a. Manipur Zofate tan chauh pawh a ni lo, Mizorama Mizote tan pawh Imphala kal chu lu zawrhna ni mai,” a ti.

“Imphai phairuam hi mi naran chu sawi loh, Zohnahtlak an nih tawh phawt chuan police lal an ni emaw MLA an ni emaw, tu tan mah a him tawh lo a. Thanlon bialtu MLA, CM adviser ni bawk Vungzagin Valte pawh CM Bangla aṭanga a chhuak chu Meitei hoin na takin an sawisak rawn a. Tunah hian ram tui lei loin a awm mek a ni,” a ti.

Vungzagin sawisatute hi tumah man an la awm lo, a ti bawk.

“Kan MLA pui tawh ang tawk tura Imphal kal hi kan tan tih chi a ni lo,” a ti.

May 4-a sawisak tawk Vungzagin hi nikhaw hre loin Delhi-ah phurh thlak a ni a. Tunah hian Delhi damdawiinah enkawl mek niin, a taksa a che thei lo a, a rilru lam pawh a harh chiang thei lo a ni.

“Kan quarter te, kan chenna in te pawh tih chhiat leh rawk a ni a, awmna tur pawh kan nei tawh lo hrim hrim,” tiin MLA pakhat chuan a sawi ve bawk.

Imphal leh a chhehvel Meitei chen tamna khua chu Zohnahthlak hrim hrim tan a him lo a, security force lama mi pawh Meitei Nuho (Meira Pabis) ten an ID an check sak vek zel a ni.

Hetih lai hian news report ṭhenkhatah Manipur CM N Biren Singh-in Kuki-Zo MLA te nen an inbe pawp reng nia a sawi chu, Kuki-Zo MLA te hian thu dik lo a nih thu an sawi.

“Tun boruakah hi chuan CM Biren Singh biak tumna hi kan nei lo hrim hrim a. Keimahni nena inbe pawp reng anga a insawi hi keimahni MLA sawm te inkara hem a thlak duh vang mai maiah ka ngai,” tiin Paolienlal chuan a sawi.

Zohnahthlak MLA te chuan Zohnahthlakte tan rorelna hran siam chu inremna kawng awm chhun a nih thu an sawi nawn a, chu India Constitution-ah tih theih a nih thu an sawi a ni.

Meitei leh Zohnahthlak te hi engti kawng maha inkal pawh leh thei niin an ngai tawh lo a, remna kawng awmchhun chu rorelna hran ve ve pek a ni, an ti.

This website uses cookies to improve your web experience.
Home
Zoram Chronicle
Subscribe
Facebook