Skip links

Union HM Amit Shah-a’n ITLF te ruang phum tumna sawn turin ngen

Aizawl: Union Home Minister Amit Shah chuan Manipura Zohnahthlak pawl hrang hrang hotu intelkhawm Indigenous Tribal Leaders’ Forum te chu Manipur buaina a thi Zohnahthlakte ruang phum an tumna hmun chu sawn turin a ngen.

Tarlan tawh angin ITLF hruaitu te hian Amit Shah sawmna angin amah hmu turin Pathianni (August 6) khan Lamka (Churachandpur) chhuahsanin Aizawl an rawn pan a. Aizawl atangin Ṭhawhṭanni (August 7) khan Delhi an pan leh a, nimin (August 8)-a inhmu tura ruahman a ni na a, Shah hi Lok Sabha session lamah a buai deuh avangin vawiin Nilaini (August 9) khan an inhmu ta a ni.

ITLF te hian August 3 khan Zohnahthlak thi te ruang, Lamka district hospitala dah te chu S Boljang hmunah phum an tum a, hei hi Meitei hoin “kan ram chin a ni e” tiin nasa takin an dodal a. Buaina lian tham chhuak leh mai thei a nih avangin Shah hian ITLF te chu ni nga chhung nghak leh rih turin a rawn ngen a, a ngenna chu ITLF te hian Mizoram chief minister Zoramthanga an rawn zet hnuah an pawm ta a nih kha. S Boljang hmun hi Lamka district-a Torbung ram chhunga awm nia ngaih a ni a, Meitei lam hian Bishnupur district ram chin a ni e, tiin an rawn chuh buai a ni.

Chumi hnu chuan Shah hian ITLF hruaitute chu Delhi-a inbiak puiah a sawm leh a. ITLF te hian chief minister Zoramthanga thurawn angin inbiakna neih hi an remti ta a.

Union Home Minister-in ruang phum an tumna sawn tura a ngen chungchangah, ITLF thupuangtu Ginza Vualzawng chuan, “Mipuite nena inrawn tlanga thuthlukna siam kan ni a, kan haw phawt ang a, mipuite nen kan inrawn leh phawt loh chuan chuti maiin ngaihdan kan siam thei lo,” tiin a chhang niin a sawi.

Martarte ruang phum hun sawn tura ngenna an tih hlawhtlin rual khan ITLF pawhin thil phut an nei ve a; chung zingah chuan tunah Imphal damdawiin hrang hranga Zofate ruang la awm mek chu Lamka-ah phurh ni rawh se, tih a tel a.

“Imphala kan mite ruang la awm chu identification tih hnuah a rang thei ang bera an district theuha thawn turin min tiam a ni,” Ginza chuan a ti.

ITLF te hian a hmaa point nga demand an lo siam tawh bakah khan thil hrang hrang Amit Shah hnenah hian an sawi a, a chhanna chu a lawmawm lam zel niin a sawi.

Manipura Zofate tan inrelbawlna hran an phut chungchang pawh Amit Shah hnenah hian thlen nawn leh a ni a. Shah chuan political solution siam tur pawhin tharum thawhna a tawp hmasak phawt a ngai tih sawiin, tharum thawhna a reh theihna turin buffer zone-a duty tur central force thawn luh belh a nih tur thu ITLF hruaitute hi a hrilh a ni.

This website uses cookies to improve your web experience.
Home
Zoram Chronicle
Subscribe
Facebook