Skip links

Union Minister Rijiju Mizoram in-charge atan ruat

Aizawl: Arunachal Pradesh BJP hruaitu leh Union Minister for Earth Sciences ni mek Kiren Rijiju chu Inthlan kaihnawiha BJP Mizoram in-charge atan central party hruaitute’n an ruat.

Mizoram hruaitute’n Zoram Chronicle an hrilh danin Rijiju bakah hian Nagaland Deputy Chief Minister Yanthungo Patton leh BJP national secretary chu co-in charge atan an ruat bawk.

Heng BJP hruaitute hian Inthlan kaihnawihah Mizoram an vil dawn a ni.

Nimin Zirtawpni khan BJP national spokesperson chuan Mizoram Assembly Inthlan atan an party candidate an puan thuai tur thu a lo sawi tawh bawk.

Mizoram BJP hruaitute sawi danin BJP hian seat 40-ah candidate siam theih an inbeisei a ni.

Saffron party hian Election Management Committee pawh din tawhin chairman atan party president Vanlalhmuaka ruat niin co-chairman atan Assembly Speaker bang ta Lalrinliana Sailo chu ruat a ni bawk.

He Election Management Committee-ah hian Dr B D Chakma MLA, Mara Autonomous District Council (MADC) CEM  M Laikaw leh T Zakunga, MDC, MADC te chu member zinga mi an ni a. MNF atang bang ta Dr K Beichhua chu convener a ni.

Politics chiktute chuan BJP hian minority area-ah seat 4 atanga seat 5 tal lak an inbeisei hle a, sawrkawrna chelhtu lama tel an tum hle niin an sawi.

Advertisment


This website uses cookies to improve your web experience.
Home
Zoram Chronicle
Subscribe
Facebook