Skip links

Zofate ruang phum hun sawn hlat a ni

Aizawl: Manipur buainaa Zofate thi te ruang tun thlenga la vui loh chu Ningani (Aug 3) hian boruak ṭang tak hnuaiah a ruala vui tum a ni a, mahse Ministry of Home Affairs lam atang ngenna avangin thulh rih a ni.

Ruang phumna hmun tura an ruahman S Boljang, Lamka (Churachandpur) district chhunga mi hi Meitei chenna Bishnupur district hnaiha awm a nih avangin Meiteiin kan ram chin a ni e tiin phum an phal lo a, nasa taka dodal tumin an inhawr khawm a. Buaina a chhuah ngei rin a ni a.

Hetih lai hian MHA lam atangin ni nga chhung nghak rih tur ngenna a lo thleng a. MHA hian ni nga in nghah theih chuan phumna tura in ruahmanna hmun hi chin fel a ni ang tiin Indigenous Tribal Leaders’ Forum te hi a rawn tiam a ni.

ITLF te hian ni nga chhung nghah rih chu an rem ti a. Mahse, ni nga chhung kan nghak dawn a nih chuan tiin phut let an nei ve ta thung:

1. Ruang phumna tur hmun S Solbung (Dag no 2022, 2025, 2161 and 2162 of 98-Torbung Lourup of Churchandpur district) hi dan hmangin min chen fel sak (legalise) rawh se;

2. Zofate himna atan Manipur state police tumah hill district-ah dah (deploy) loh ni rawh se;

3. Kan mitthi te hi kan phum rih dawn lo a nih rau rau chuan Zofa ruang Imphal hospital mitthi dahnaa la awm zawng zawng te hi Lamka (Churachandpur) ah rawn phurh chho ni rawh se;

4. Rorelna hran kan ngiat mek hi a rang lamin min ngaihtuah sak rawh se; tih leh

5. Zofate chhan hrang hrang avang Imphal jail-a tang mek te hi state dangah mi sawn sak rawh se, tih te chu an thil phut a ni.

Buaina lian zawk a chhuah belh hlauhawm tak karah mitthite ruang hi phum luih tho tum a nih laiin MHA lam atanga ngenna bakah Mizoram chief minister Pu Zoramthanga pawhin a han ngen ve bawk a. Pu Zoramthanga chuan “Ngun deuhin ngaihtuahna hmang rawh u, central sawrkar ngenna hi lo bengkhawn sak ula, kan mamawh leh duh mek min tih sak tu tur an nih hre reng chungin” tiin aw a han nei niin sawi a ni.

Thu dawnnain a sawi danin, Manipur Zofate te aiawh pawl ITLF hian Pu Zoramthanga ngenna hi zahawm an ti a. India ram chief minister zingah an tana dinga auchhuak ngam awm chhun a ni e, tiin a ngenna hi zawm ngei ṭul an ti bawk a ni.

ITLF atanga thu kan dawn danin vawiinah hian mitthi te chu phum ni dawn rih loh mah se, a vuina hun hman erawh chu kal tlangpui tum a ni a. Peace Ground, Tuibong (Tuibuang) ah muanawm taka vuina hun hi neih an tum ta tho a ni. 

Hetih lai hian Lamka frontline Kangvai lamah chuan he thu ziah lai mek hian silai a ri a. Tuibong hi Lamka hmarlam tawn tirha awm a ni a. Tuibong atanga Kangvai hi km 13 vel niin Kangvai a chin thlang lam chu Meitei chenna chin a ni tawh a ni. Kangvai thlang lam Imphal lam kawngah hian Meitei khua, Kwakta, Tranglaobi leh Moirang Lamkhai te a awm a, heng khua hi Meitei ho pawh hian an chhuahsan deuh vek tawh thung.

This website uses cookies to improve your web experience.
Home
Zoram Chronicle
Subscribe
Facebook